روسیانین دولت باشچی‌سی ولادیمیر پوتین مارتین ۱۸-ده صنایع‌چیلر و صاحیبکارلار اتفاقینین قورولتایینین قاپالی حیصه‌سین‌ده بیلدیریب کی، ایلحاق ائدیلمیش بؤلگه‌لر روسیانین اراضی‌سی کیمی تانینسا، مسکوا اودسایا ادعا ائتمه‌یه‌جک.

Axar.az خبر وئریر کی، بو باره‌ده «کومرسانت»ین خصوصی مخبیری آندری کولسنیکوو معلومات یاییب.

پوتین گؤروشده دئییب کی، روسیا ۲۰۲۲-جی ایلده اوکراینایا قارشی «خصوصی حربی عملیات» آدلاندیردیغی محاربه‌نی باشلامازدی، اگر غرب کریمی روسیانین ترکیبینده قبول ائتسیدی و دونتسک و لوگانسکین مختاریتینی تانیسایدی.

«کومرسانت»ین منبع‌لری بیلدیریبلر کی، حاضردا دانیشیقلاردا صحبت روسیانین الده ائتدیکلرینی الین‌دن آلماغین ممکن‌سوزلویوندن و روسیانین ترکیبینده تانینمالی اولان اراضیلردن گئدیر: کریم، سواستوپول و دؤرد معلوم اراضی – «لوگانسک و دونتسک خالق رسپوبلیکالاری»، خرسون و زاپوروژیه ویلایتلری».

«گؤروش اشتراکچیلارینین دئدیینه گؤره، اگر بو، یاخین زمان‌دا باش وئررسه، روسیا اودسایا و حاضردا اوکراینایا مخصوص اولان دیگر اراضیلره ادعا ائتمه‌یه‌جک»، - کولسنیکوو بیلدیریب.