هامیمیزا عاید اولان بو بنزرسیز وطنیمیزین دوشدویو بو وضعیت‌دن فیزیکی آغریدان داها چوخ، داها سانجی‌لی، داها درین بیر کدر ایچینده‌یه‌م.

Kult.az خبر وئریر کی، بو سؤزلری تورک موسیقی‌سینین افسانه‌لرین‌دن اولان سزن آکسو استانبول بلدیه باشقانی اکرم اماموغلونون حبسین‌دن سونرا باش وئره‌نلر حاق‌دا قید ائدیب.

«منی دینله‌مه‌یه‌جکلرینی حس ائتسه‌م ده، مسئولیت داشییانلارا سسلنمیی اؤزومه بورج بیلیرم. بو قدر انسانین سسینی دینله‌مک، اونلاری آنلاماق، بوتون تدبیرلرینیزی حقوقا اویغون حیاتا کئچیرمک، انسان حاقلارینی اصلا پوزماماق، خصوصیله گلجییمیز اولان گنجلریمیزی گؤزونوز کیمی قوروماق، آیری-سئچکی‌لیک ائتمه‌دن بوتون وطنداشلاریمیزا قارشی عدالتلی داورانماق سیزین وظیفه‌نیزدیر. سؤیلدیکلریمی منطیقین اؤلچولری ایله دیرلندیرجیینیزه اومید ائدیره‌م»، - آکسو سوسیال شبکه حسابیندا یازیب.

قید ائدک کی، استانبول بؤیوکشهر بلدیه‌سینین صدری اکرم اماموغلو کوروپسییا و ترور تشکیلاتی ایله علاقه‌ده شبهه‌لی بیلینه‌رک، ۱۹ مارتدا ساخلانیلیب، ۲۳ مارت‌دا محکمه کوروپسییا اتهامینا گؤره اونون باره‌سینده حبس تدبیری سئچیب، ترورلا باغلی حبس طلبیندن ایسه امتنا ائدیب.

اماموغلونون ساخلانیلدیغی گوندن منصوب اولدوغو ج.ح.پ-نین فعاللاری سلسله آکسیالار کئچیریرلر. آکسیالاردا یوزلرله شخص حبس ائدیلیب.