معالیجه خرجلرینین آغیر اولماسی بؤیرک چاتیشمازلیغین‌دان اذیت چکنلرین یوکونو آرتیریر. دیالیز خسته‌لری درمانلارین الده ائتمه‌سین‌ده پروبلملری اولماسا دا، درمانلارین قیمتین‌ده ۱۰۰ – ۲۰۰ فایز آرتیم اونلارین وضعیتینی اولدوقجا چتینلشدیریب.

آخار. آذ خبر وئریر کی، بو سؤزلری «بؤیرک خسته‌لرینه دستک انجمنی»نین دیرکتورو محمد رضا تهماسیبی دئییب.

«بؤی‌رک خسته لیین‌دن اذیت چکه‌ن اینسانلارین اکثریتی کاسیب اینسانلاردیر. بوندان علاوه اونلاردا اورک چاتیشمازلیغی، تنفس پروبلمی و قاندا شکرین آرتماسی پروبلمی ده وار. بیر چوخ آنالیزلردن کئچمه‌لی و درمان قبول ائتملیدیرلر. باجاردیغیمیز قدر بئله آز تأمیناتلی خسته‌لره یاردیم گؤستریریک. بئله کی، خسته خانالارا مراجعت ائد‌ن خسته‌لرین خرجلرینین ۵۰ – ۱۰۰ فایزی انجمن حسابینا اؤدنیلیر. سون زامان‌دا یارانان اقتصادی چتین‌لیکلر اونسوز دا چتین وضعیت‌ده اولان دیالیز خسته‌لرینین وضعیتینی چوخ چتینلشدیریب، بعضا ایمکان‌سیز اولدوقلاری اوچون معین مدت درمان ایستیفاده ائده بیلمیرلر. خصوصیله، دیالیز و بؤیرک کؤچورمه عملیاتی کئچیره‌ن خسته‌لرین معالیجه خرجلری اولدوقجا آغیر اولور. انجمن طرفین‌دن گؤستریله‌ن کؤمکلیکلر اولماسا بیر چوخ خسته‌لر بئله آغیر خرجلرین عهده‌سین‌دن گله بیلمه‌یه‌جک و داها آغیر وضعیتله اوزلشه بیلرلر»، دئیه تهماسیبی دیالیز خسته‌لرینی وضعیتین‌دن دانیشیب.