یوخو پروبلملری اینسولت ریسکینی ۱۶% آرتیریر.

Axar.az خبر وئریر کی، نئورولوق آلکساندرا آلکهینا بئش و یا داها چوخ یوخو پوزغونلوغو سیمپتوموندان اذیت چکه‌ن انسانلاردا اینسولت ریسکینین ایکی‌قات آرتدیغینی دئییب.

او قید ائدیب کی، اینسولت جدی و حیاتی تهلوکه یارادان تعجیلی وضعیتدیر:

"بو، بئینین بیر حصه‌سینه قان تداروکو کسیلدیکده، قان لاختالانماسی و یا قان دامارینین ییرتیلماسی سببیندن باش وئریر. سیقارت، یوکسک تضییق، یوکسک خولسترول و آرتیق چکی و یا پیله‌نمه کیمی بیر چوخ عاملین اینسولت ریسکینی آرتیردیغی معلومدور.

تدقیقاتلار گؤستریر کی، یوخو وردیشلرینیز سیزی داها چوخ ریسک آلتینا قویا بیلر. یوخوسوزلوق سیمپتوملاری اینسولت احتمالینی آرتیریر. سحر یورغونلوق حسی قدر یونگول اولا بیله‌ن بیر-دؤرد یوخوسوزلوق سیمپتومونون اولماسی ریسکی ۱۶ فایز آرتیریر. بئش-سککیز یوخوسوزلوق سیمپتومو اولانلاردا اینسولت ریسکی ۵۱ فایزه قدر آرتیب.

بو سیمپتوملارا آشاغیداکیلار داخلدیر:

- یوخویا گئتمکده چتینلیک چکمک؛

- یاتماقدا چتینلیک چکمک؛

- چوخ ائرکه‌ن اویانماق و یئنیدن یوخویا گئده بیلمه‌مک؛

- سحر دینجلمه‌مک.

یوخو و اینسولت آراسینداکی علاقه ۵۰ یاشدان کیچیک انسانلار آراسیندا ان گوجلو ایدی: اگر اونلاردا بئش-سککیز یوخوسوزلوق سیمپتومو وارسا، یونگول یاتانلارا نسبتا اینسولت کئچیرمه احتمالی تخمیناً دؤرد دفعه چوخ ایدی. بو آرادا، عینی سایدا سیمپتومو اولان ۵۰ یاشدان یوخاری انسانلارین اینسولت ریسکی یاشیدلارینا نسبتا ۳۸% داها یوکسک ایدی.

گئجه‌ده آلتی ساعتدان آز یاتماق اورک خسته‌لیینه و اینسولتا سبب اولا بیلر. دپرسیا، دیابت، هیپرتونیا و اورک خسته‌لیی اولان انسانلاردا ریسکلر داها دا یوکسکدیر".