خارج‌ده فعالیت گؤستره‌ن و ایران‌دا ملتلرین دموکراتیک کوالیسیاسینا عضو اولان بیر نئچه تشکیلات ایران اسلام رسپوبلیکاسینین آذربایجان رسپوبلیکاسینین داخلی ایشلرینه مداخله‌لرینی پیسله‌ین و آذربایجان خالقینین و دولتینین ملی سوورنلیک حقوقونون مدافعه‌سی ایله باغلی بیانات یاییبلار.

Axar.az خبر وئریر کی، بیاناتی ملی دیرنیش تشکیلاتی، گونئی آذربایجان دموکرات پارتییاسی، آذربایجان مرکز پارتیاسی، آذربایجان اؤیرنجی حرکاتی، قاشقایی آزادلیق یولو پارتیاسی ایله یاناشی، ایران عربلرینین "اهوازین آزادلیغی اوچون عرب مبارزه حرکاتی" و "بلوچستان راجی تپاکی گل پارتیاسی" دا امضالاییب.

بیاناتین متنی آشاغیدا تقدیم اولونور:

ایران اسلام رسپوبلیکاسی ۱۹۷۹-جو ایل انقلابیندان سونرا حاکمیته گلدیی ایلک گونلردن اعتباراً اؤز سرحدلری داخلینده وطنداشلارین رفاهینا، انکشافینا و حقوقلارینا دقت یئتیرمک عوضینه، استراتژی سیاستینی «انقلابین اخراجی» و اؤزونون ارتجاعچی، ایدئولوژی نورما و معیارلارینی سرحدلردن کنارا قبول ائتدیرمک اوزرینده قوروب. بو مداخله‌چی یاناشما عراق، سعودیه عربستانی، سوریه، ترکیه، لبنان و دیگر اسلام اؤلکه‌لری ده داخل اولماقلا یاخین شرق اؤلکه‌لرینی بو حاکمیتین داغیدیجی فعالیتلرینین حیاتا کئچیریلدیی مکانلارا چئویریب.

قید ائتمک لازیم‌دیر کی، سویوق محاربه دورونده سووئت اتفاقیندا و کمونیست چین‌ده مسلمان وطنداشلارین قانلی و سیستماتیک شکیل‌ده رپرسسیایا معروض قالماسینا باخمایاراق، ایران حاکمیتی اونلارین حقوقلارینی مدافعه ائتمک اوچون هر هانسی جدی اعتراض و یا مؤقع بیلدیرمکدن چکینیب و چکینمک‌ده داوام ائدیر. لاکین آچیق ضدیت تشکیل ائد‌ن بیر سیاستله، دییشیک‌لیک امکانلارینین داها گئنیش اولدوغو مسلمان و قونشو اؤلکه‌لرین داخلی ایشلرینه داواملی مداخیله ائد‌رک گرگینلیک یاراتماغی گونده‌مینه داخیل ائدیب.

سووئت اتفاقینین داغیلماسی و یئنی رسپوبلیکالارین مستقل‌لیک قازانماسی ایله ایران اسلام رسپوبلیکاسی اؤز ژئوسیاسی و ایدئولوژی هدفلرینین احاطه دایره‌سینی گئنیشلندیریب. بو دفعه یئنی مستقل‌لیک الده ائتمیش اؤلکه‌لرین داخلی نظامینین، تهلوکه‌سیزلیینین و سیاسی ثابیتلیینین پوزولماسی تهران رژیمینین اساس مقصدلریندن بیری کیمی معین‌لشدیریلیب.

بو آرادا آذربایجان رسپوبلیکاسی ان اوزون اورتاق سرحده مالک اولماسی، اهالی‌سینین اکثریتینین شیعه مسلمانلاردان عبارت اولماسی، ائلجه ده آراز چایینین بو تاین‌دا یاشایان میلیونلارلا آذربایجانلی ایله درین مدنی و دیل باغلاری سببیندن ایرانین اکسپانسیونیست سیاستینین اساس و مقصدیؤنلو هدفلریندن بیرینه چئوریلیب.

ایران اسلام رسپوبلیکاسی سون اوتوز ایلده‌ن آرتیق مدتده آشاغیداکی واسطه‌لردن استفاده ائد‌رک یئنی قورولموش آذربایجان دولتینین ثابیتلیینی سارسیتماغا چالیشیب:

• آذربایجان رسپوبلیکاسینین داخلی و سیاسی ایشلرینه داواملی مداخله؛

• تروریزمین و تهلوکه‌سیزلیین پوزولماسینین تشویقی و اخراجی؛

• ویلایتی-فقیه ایدئولوگیاسینا باغلی دینی طلبه و آگئنت شبکه‌لرینین تشکیل ائدیلمه‌سی، تعلیم کئچمه‌سی و سلاحلاندیریلماسی؛

• آذربایجان رسپوبلیکاسینا نارکوتیک ماده‌لرین قاچاقمالچی‌لیغی؛

• دشمن‌چی‌لیک مقصدلی تلویزیون کاناللارینین و مختلف اینترنت سایتلارینین یارادیلماسی.

آذربایجان رسپوبلیکاسیندا سون هفته‌لر باش وئره‌ن حادثه‌لر و پروسسلر ایرانین تهلوکه‌سیزلیک و کشفیات قوروملارینین بو رسپوبلیکادا ثابت‌لییی پوزماق جهدلرینده‌کی آچیق رولونو بیر داها نماییش ائتدیریب.

بیز، بو بیاناتی امضالایانلار، ایران اسلام رسپوبلیکاسینین رگیون اؤلکه‌لرینین، خصوصیله آذربایجان رسپوبلیکاسینین داخلی ایشلرینه داواملی مداخله‌لرینی قطعیتله پیسله‌یه‌رک وورغولاییریق:

یالنیز رگیون اؤلکه‌لرینین خالقلاری و آذربایجان رسپوبلیکاسینین خالقی اؤز مقددراتلاری، اداره‌ائتمه فورمالاری و حیات طرزلری حاقیندا قرار وئرمک حقوقونا مالیکدیرلر. هئچ بیر خارجی دولتین اونلارین ملی اراده‌سینه مداخله ائتمک حقوقو یوخدور.

ایران سرحدلری داخلینده دموکراتیا طرفداری اولان قوه‌لری وحشیجه‌سینه رپرسیایا معروض قویان، وطنداشلارین، خصوصیله قادینلارین بوتون فوندامنتال آزادلیقلارینی تاپدالایان، عموم‌اولکه اعتراضلاریندا، او جمله‌دن دی آیی فاجعه‌لرینده اون مینلرله آزادلیق‌سئور انسانی قانینا قلتان ائد‌ن بیر حاکمیتین باشقا اؤلکه‌لرین وطنداشلارینین حقوقلارینی مدافعه ائتمک ادعاسیندا بولونماغا هئچ بیر صلاحیتی، لگیتیم‌لییی و حقوقو یوخدور.

ایران‌دا یاشایان خالقلارین حقوقلارینی غصب ائد‌ن بیر رژیم باشقا خالقلارین حقوقلارینین مدافعه‌چی‌سی اولدوغونو ادعا ائده بیلمز.

یاشاسین آذربایجان خالقینین مبارزه‌سی!

ارتجاعچی ایران اسلام رسپوبلیکاسی رژیمی دئوریلسین!

ایران‌دا ملتلرین دموکراتیک کوالیسییاسی

۲۷ اوکتبر ۲۰۲۶-جی ایل