سوریا بیر دولت اولاراق آرتیق موجود دئییل. عینی زمان‌دا، سوریا فاکتورو تکجه بو کئچمیش دولتین اراضی‌سی ایله بیتمه‌یه‌جک و چوخ گومان کی، تئزلیکله رگیونون خریطه‌سینده چوخ جدی دییشیکلیکلرین شاهدی اولاجاغیق.

Axar.az خبر وئریر کی، بو سؤزلری ارمنی پولیتولوق آرمان آبوویان سوریادا اسد رژیمینین دئوریلمه‌سی حاقدا قید ائدیب.

او بیلدیریب کی، سوریا فاکتورو دنیانین بؤیوک پارچالانماسی و یا یئنی «پوتسدام کنفرانسی» عرفه‌سینده کسکین شکلده آکتیولشیب.

سوریادا «کیملرین نه‌لر الده ائتمه‌سی»نه ایسه آبوویان بو جور جواب وئریب:

«تورکیه بؤیوک توران لاییحه‌سینین یاخین شرقی ده احاطه ائد‌ن حصه‌سینی سلاح گوجو ایله ثمره‌لی شکلده حیاتا کئچیره‌رک، بؤلگه‌ده‌کی فیزیکی وارلیغینی اهمیتلی درجه‌ده گئنیشلندیردی. بو دا اؤز نوبه‌سینده تورکیه-آذربایجان تاندمینین ارمنیستانی داها دا سیخیشدیرماق و مرکزی آسیا استقامتینده غیر-ثابتلیک یاراتماق جهدلرینین آکتیولشمه‌سینه گتیریب چیخاراجاق.

اسرائیل عراق و سوریا اراضی‌سیندن کئچمکله ایرانلا قورو علاقه‌سینی کسه‌رک، «مقاومت اوخو» آدلاندیریلان قوه‌لری ضررسیزلشدیردی.

آمریکالیلار کوردلر واسطه‌سیله فارس کؤرفزیندن، یاخین شرقدن آوروپایا قدر قورو لوگیستیکا مارشروتلارینا آکتیو تأثیر ائتمک امکانی وئرن سوریا اراضی‌سینین بیر حصه‌سینی اله کئچیرمکددیرلر.

روسیا رگیون‌دا ان مهم تأثیر آلتینی ایتیریر و اساس سوال روسیانین سوریا لاتاکییاسیندا حربی موجودلوغونو قورویوب-قورومایاجاغیدیر.

ان آجی «پای» ایرانا چاتدی کی، بونون اوچون سوریانین پارچالانماسی کورد و بلوچ فاکتورلارینین آکتیولشمه‌سی ایله هم ایران سرحدلری بویونجا، هم ده اؤلکه داخلینده غیر-ثابتلییه سبب اولا بیلر».

آبوویان ادعا ائدیب کی، اورتامدتلی تاریخی پرسپکتیوده داها بیر «روسیا-تورکیه حربی قارشیدورماسی» آیدین گؤرونور.