تورکیه‌لی مشهور موغه‌ننی هانده یئنر موغلادا کئچیریله‌ن کنسرت زمانی پرزیدنت رجب طیب اردوغانا قارشی تحقیرامیز ایفاده‌لر ایشلتمه‌سی ادعاسی ایله استنطاقا ایفاده وئرمه‌یه چاغیریلیب.

Axar.az خبر وئریر کی، موغه‌ننی صحنه‌ده چیخیشی زمانی پرزیدنته اشاره ائد‌رک «بو دورو چوخ گؤزل دئویرجه‌ییک» دئدیی ادعا اولونوب.

استنطاق چرچیوه‌سینده موغه‌ننی باره‌سینده هر هانسی ساخلانیلما تدبیری گؤرولمه‌ییب، لاکن اونون شبهه‌لی شخص قسمینده ایفاده‌سینین آلینماسینا قرار وئریلیب.

یئنر پروکورورلوغا وئردیی ایفاده‌سینده بیلدیریب کی، صحنه‌ده‌کی حرکتلری سیاسی مؤقع دئییل، موسیقینین ریتمی و تماشاچیلارین جوشقوسونا وئریله‌ن آنی رئاکسیا اولوب.

موغه‌ننی قید ائدیب کی، فرقلی زمان و مکانلاردا باش وئرن حادثه‌لر سانکی بیر حادثه کیمی تقدیم اولونوب. اونون سؤزلرینه گؤره، صحنه‌ده توللانماسی ایله «بو دورو دئویرجه‌ییک» ایفاده‌سی عینی آنا عاید دئییل.

یئنر بیلدیریب کی، همین ایفاده باشقا بیر کنسرتینده، هاربیئده کئچیریله‌ن چیخیش زمانی «بودروم» ماهنی‌سینا استنادن گنجلره موتیواسیا کاراکترلی نیطقینین بیر حصه‌سی اولوب. اونون فکرینجه، بو ایکی آیری حادثه‌نین بیرلشدیریلمه‌سی مقصدلی شکلده یانلیش تقدیماتدیر.

صنعتچی ایفاده‌سینده همچنین بیلدیریب کی، او، فعالیتینی هر زمان بیرلشدیریجی گوج کیمی گؤروب. او، ۱۵ ایول ۲۰۱۶-جی ایل تورکیه‌ده چئوریلیش جهدی سونراسی دموکراتییا آکسییالاریندا اشتراک ائتدیینی، یئنیکاپی میتینقینده یئر آلدیغینی و پرزیدنتله مختلف تدبیرلرده گؤروشدویونو خاطیرلادیب.