مینسک گروپونون آرتیق هئچ بیر رولو قالماییب.

Axar.az خبر وئریر کی، بونو جیمستاون فوندونون اداره هیتی‌نین عضوو، آمریکانین آذربایجان‌داکی سابق سفیری متیو برایزا بیلدیریب.

آذربایجانلا ارمنیستان آراسیندا نورماللاشما پروسسینی و صلح اوچون ارمنستان کونستیتوسییاسینین دییشمه‌لی اولدوغونو دئین سابق سفیر، مینسک گروپونا دا احتیاجین قالمادیغینی قید ائدیب.

«چونکی آذربایجان و ارمنستان اؤز آرالاریندا دانیشیقلار آپارماق قرارینا گلدیک‌ده، آرتیق واسطه‌چیلره احتیاج یوخ ایدی و اونلار صلح مقاویله‌سی امضالاماغا یاخیندیرلار. بئله اولان حال‌دا، البته کی، مینسک گروپونا احتیاج یوخدور».

متیو برایزا علاوه ائدیب کی، همچینین ترامپ آدمینیستراسییاسینین دا ایکی اؤلکه آراسیندا واسطه‌چیلیینه احتیاج قالماییب. چونکی هر ایکی اؤلکه واسطه‌چی اولمادان صلحه داها چوخ یاخینلاشیر.

«اگر ارمنیستان و آذربایجان صلح مقاویله‌سی امضالاماق اوزره‌دیرسه، آمریکانین و یا باشقا بیر اؤلکه‌نین واسطه‌چیلیینه احتیاج یوخدور. من اومید ائدیره‌م کی، اونلار صلح مقاویله‌سینی امضالایاجاقلار. بیلدییمیز کیمی، راضیلاشما متنی آرتیق یکونلاشماق اوزره‌دیر و ایندی اساس مسئله ارمنستانین کونستیتوسییاسینی آذربایجانین طلبینه اویغون دییشدیریلمه‌سی‌دیر. منه ائله گلیر کی، بو باش وئره‌جک. طبیعی کی، اگر باش ناظر نیکول پاشینیانین سیاسی رقیبلری غیری-قانونی حرکته ال آتمازلارسا. هامیمیز خاطیرلاییریق کی، ۱۹۹۹-جو ایلین اوکتیابریندا دا ارمنستان و آذربایجان مینسک گروپونون سعیلری نتیجه‌سینده صلحه یاخین ایدیلر، لاکین صلحون علیهدارلاری ارمنستانین باش ناظرینی و پارلامنت صدرینی قتله یئتیردیلر»، - دئیه برایزا علاوه ائدیب.