آوروپا تهلوکه‌سیزلیک و امکداشلیق تشکیلاتی-نین(آتت) باش کاتبی، تورکیه‌لی دیپلمات فیرودین سینیرلی‌اوغلو ایروان‌دا باش ناظیر نیکول پاشینیان و خارجی ایشلر ناظیری آرارات میرزویانلا گؤروشوب. ایکی آی اول فیرودین سینیرلی‌اوغلو نیکول پاشینیانلا مونهن تهلوکه‌سیزلیک کونفران‌سیندا دا گؤروشموشدو. ایروان‌داکی گؤروشلرده ارمنیستانین آتت-له امکداشلیغی و آذربایجانلا آپاریلان دانیشیقلارین حاضیرکی وضعیتی مذاکره اولونوب.

Axar.az خبر وئریر کی، بو باره‌ده پولیتولوق ائلخان شاهین‌اوغلو قید ائدیب.

او بیلدیریب کی، رسمی ایروان آتت-له امکداشلیغی داوام ائتدیرمک ایستیرکه‌ن، رسمی باکینین بئله بیر ایستیی یوخ‌دور:

«آتت ۳۰ ایل عرضینده قاراباغ مناقشه‌سینی حل ائده بیلمه‌دی، بو سببدن آذربایجان‌دا ان چوخ تنقید ائدیله‌ن تشکیلات ایدی. رسمی باکی ایکینجی قاراباغ محاربه‌سیندن سونرا آتت-این مینسک گروپونون لغوینه چالیشیر. بونا باخمایاراق، آتت-این باش کاتبینین تجربه‌لی و تورکیه جمهورباشقانی رجب طیب اردوغانا یاخینلیغی ایله بیلینه‌ن تورکیه‌لی دیپلمات اولدوغو نظره آلیناراق، رسمی باکی فیرودین سینیرلی‌اوغلو ایله تماسدان امتنا ائتمه‌یه‌جک. اوراسی دا آیدیندیر کی، توتدوغو وظیفه‌یه گؤره فیرودین سینیرلی‌اوغلونون رسمی باکینین «مینسک گروپو لغو اولونمالیدیر» یاناشماسینی دستکله‌مه‌سی چتین‌دیر. آنجاق تورکیه‌لی دیپلمات اونو دا آنلاییر کی، دئ-فاکتو موجود اولمایان مینسک گروپونین دئ-یورئ ده لغوی عمومی ایشین خیرینه‌دیر. بو صلح سازشینین امضالانماسی اوچون ایکی اساس شرط‌دن بیرینین یئرینه یئتیریلمه‌سیدیر».