اولدن بللی ایدی کی، آتشکس کورکدیر، صلح ممکن دئییل. اورتایا قویولان ۱۴ بندلیک سندده ائله جدی بندلر وار ایدی کی، هم ایرانین، هم ده آمریکانین یئرینه یئتیرمه‌سی پروبلم‌لی گؤرونوردو. مثلاً، آمریکا تظمینات اؤد‌مه‌لی ایدی. آمریکا هئچ واخت تضمینات اؤدمز. هرمز بوغازی ایله باغلی مسئله ده آیدین دئییلدی.

بو سؤزلری Axar.az-آ آچیقلاماسین‌دا پولیتولوگ الخان شاهینوغلو آمریکا و ایران آراسین‌دا آتشکسین یئنی‌دن پوزولماسینی شرح ائدرکه‌ن دئییب.

«ایران هرمزه نظارت ائتمک ادعاسی ایله گمیلره ضربه ائندیردی. آمریکا دا بؤیوک دولت کیمی بونا سئیرچی قالا بیلمزدی. جواب آددیملاری آتدیلار و وضعیت یئنی‌دن گرگینلشدی»، - او بیلدیریب.

پولیتولوق قید ائدیب کی، بؤیوک محاربه‌نین باشلایاجاغینی احتمال ائتمیر:

«اما بئله لوکال توققوشمالارین داوام ائدجیینی دوشونمک اولار. چونکی ایران هرمز بوغازی مسئله‌سینده گئری چکیلمیر».

پولیتولوگ خاطرلادیب کی، محاربه‌دن اول هرمز بوغازی آدیندا پروبلم یوخ ایدی:

«بوتون گمیلر راحت شکیل‌ده بوغازدان کئچیردی، نفت و مایع‌لشدیریلمیش گاز داشینیردی. پروبلم اوندادیر کی، ایران اونا عاید اولمایان سولاردا حرکت ائد‌ن تانکرلره ده ضربه‌لر ائندیریر. مثلاً، هرمز بوغازینین ایکی ساحلی وار - بیری ایران، دیگری عمان طرفی‌دیر. تانکرلرین چوخو عمان ساحللرینه یاخین سولاردان کئچمه‌یه چالیشیر. ایران ایسه اونلارا دا هجم ائدیر. بو دا آمریکانی قیجیقلاندیریر. نتیجه‌ده آمریکا جواب ضربه‌لری ائندیریر».

الخان شاهینوغلو بوندان سونرا یئنی‌دن آتشکس اولاجاغینا اینانمیر:

«یعنی آتشکس اعلان اولونسا بئله، یئنه ده تئز پوزولاجاق. ایران‌دا بو رژیم خارجی سیاستینی دییشمدیی مدتده وضعیت فرق‌لی اولمایاجاق. بیز بونو اؤز نمونه‌میزده ده گؤردوک. آذربایجان اولاراق بیز قونشو دولت‌ده محاربه‌نین علیه‌ینه ایدیک. هئچ بیر اوچونجو دولته اؤز اراضیمیزدن استفاده ائتمه‌یه امکان وئرمدیک. اما بونا باخمایاراق، بیزه ده درون آتدیلار.

یعنی ایران‌دا قرارلارین نئجه وئریلدیی تام آیدین دئییل. عالی دینی لیدر وار، یا یوخ، بیلینمیر. سپاهین بیر سیرا گنراللاری دا قرارلارا جدی تأثیر گؤستریرلر. گؤرونور، اونلار آمریکا ایله آتشکس‌ده او قدر ده ماراقلی دئییللر.

اؤلکه اقتصادیاتینی داها چوخ پرزیدنت دوشونور. اما ایران‌دا پرزیدنتین صلاحیتلری او قدر ده گئنیش دئییل».