آمریکا-اسرائیل جوتلویونون ایرانا هجوملاری باشلایاندا بو ساواشین یگانه هدفینین ایرانین انرژی رسورسلارینا نظارت ائتمک دئییل، بوندان داها اهمیت‌لی بیر مقصدین - گلوبال تجارت مارشروتلارینی دییشمک اولدوغونو بیلدیرمیشدیم. سنتکوم-ون ایرانا دوننکی هجوملاری بو احتمالی گوجلندیریر.

Axar.az خبر وئریر کی، بو سؤزلری پولیتولوگ حیدر اوغوز قید ائدیب.

«دوننکی هجوملاردا ایکی مهم هدف واردی - بیری چابهار لیمانی، دیگری ایسه گلستان ایالتینده یئرلشن آغقالا دمیر یولو خطی. معلوم‌دور کی، چابهار نفت و گاز رسورسلاری ایله فرقله‌نمه‌یه‌ن اراضی‌دیر. بو لیمان شهری پاکستانین گوادار لیمانی ایله قونشودور و ایرانین بیرباشا هیند اوکیانینا آچیلان قاپیسی‌دیر. دولاییسییلا چابهارین انرژی منبعی کیمی دئییل، لوجستیک اهمیتی وار. چابهار لیمانی استفاده‌یه یارارسیز حالا سالینارسا، ایران‌دان پاکستان اوزریندن چینه نفت نقلینین ده اؤنو کسیله بیلر. ظنیمجه، اورانین هدفه آلینماسینین اساس مقصدی بودور.

گلستان ایالتینین آغقالا شهرینده یئرلشن آغتکه خان دمیر یولو دا ایرانی روسیا، مرکزی آسیا و چینله بیرلشدیره‌ن اؤنملی لوچستیک قووشاقلاردان بیریدیر. ایرانین «جهان» خبر پورتالی «آغقالا هارادادیر و آغقالا کؤرپوسونون اهمیتی ندیر؟» باشلیق‌لی مقاله‌ده بو باره‌ده یازیب.

بیلدیریلیب کی، آغقالا گلستان ایالتینین شمال شهرلریندن بیریدیر، ایرانین اورتا آسیا اؤلکه‌لری ایله علاقه قورماسی اوچون ان واجب قاپیلاردان بیری حساب اولونور.

«گلستان ایالتین‌ده‌کی نینوو محافظه‌چیلرینین رسمی آچیقلاماسینا گؤره، بو سحر آغقالا کؤرپوسو آمریکا کروز راکتی ایله هدفه آلینیب. بو کؤرپو گرگان-اینجه‌بورون دمیر یولو مارشروتوندا یئرلشیر و رسمیلرین سؤزلرینه گؤره، هجوم کؤرپویه زیان ووروب، لاکین هئچ بیر ایتکی ایله نتیجه‌له‌نمه‌ییب.

آغتکه خان کؤرپوسو تکجه یئرلی کؤرپو دئییل، هم ده اؤلکه‌نین شمال-شرق دمیر یولو مارشروتونون واجب ایستروکتورلاریندان بیریدیر و بو خط اوزره یوک و سرنیشین قطارلارینین حرکتینده مهم رول اویناییر.

بو کؤرپو نیه واجیب‌دیر؟

آغتکه خان کؤرپوسو گرگان-اینجه‌بورون دمیر یولو خطینین بیر حصه‌سی‌دیر.

بو مارشروت ایرانی اینجه‌بورون دمیر یولو واسطه‌سیله ترکمنستان، قازاخستان، روسیا و دیگر اورتا آسیا اؤلکه‌لری ایله بیرلشدیریر و بین‌الخالق شمال-جنوب نقلیات دهلیزینین، ائلجه ده آوراسیا ترانزیت دهلیزلرینین واجیب مارشروتلاریندان بیری حساب اولونور»، - مقاله‌ده وورغولانیر.
قید ائدیلیر کی، آغقالانین جغرافی موقعی بو شهره رگیونال نقلیات و ترانزیت تن‌لیکلرین‌ده خصوصی یئر وئریر. بونا گؤره ده آغقالا کؤرپوسو ساده‌جه بیر تیکینتی ایستروکتورو دئییل، هم ده ایرانین اورتا آسییا و روسییا ایله رابطه شبکه‌سینین بیر حصه‌سی‌دیر.

قیساسی، آمریکانین خصوصیله چابهار لیمانینی و آغقالا دمیر یولونو هدفه آلماسی ایرانی بین‌الخالق ترانزیت خطلرین‌دن تجرید ائتمک مقصدی داشیییر. اصلین‌ده هرمز بوغازینا هجوملارین دا اساس مقصدی آلترناتیو مارشروت آختاریشلاری ایله بیرباشا علاقه‌لیدیر. آمریکا هرمز بوغازینی کئچیلمز حالا گتیرمکله دنیانین ان اؤنملی انرژی گذرگاهی اولان بیر مارشروتو باغلاماغا و اونا آلترناتیو گئچیش خطلری آچماغا چالیشیر. یئنی دنیانین مهم انرژی و تجارت خطلرین‌دن بیر اولاجاغینی دوشوندویوموز بو مارشروت عمان و یا اماراتدان باشلایاراق سعودییه عربستانی-ایوردانیا-سوریا-تورکییه اوزریندن آوروپایا آچیلاجاق. دیگر آلترناتیو ایسه بو مارشروت‌دا تورکییه و سوریانین «بی پاس» ائدیله‌رک اسرائیل اوزریندن یونانستانا چیخماقدیر. ظنیمجه، بوتون یومورتالاری عینی زنبیله ییغماق ایسته‌مه‌یه‌ن آنگلو-ساکسون آغلی بیر-بیریله آمانسیز رقابت آپاراجاغی گؤزله‌نیله‌ن هر ایکی گذرگاهی عینی آندا ایشلتمه‌یه چالیشاجاق. نتیجه‌ده آمانسیز رقابت ترانزیت خرجلرینی ده آزالداجاق».