آنا صحیفه توپلوم |
۰۹:۱۸
گوجلو یاغیش نتیجهسینده شرقی آذربایجان ویلایتینین بیر نئچه شهرینی سئل باسیب، نتیجهده اونلارلا اینسان اؤلوب و یا ایتکین دوشوب.
آخار. آذ خبر وئریر کی، بو بارهده شرقی آذربایجان والیلیگی بحران مودیریتی شعبهسینین ریسی خلیل ساعی دانیشیب. ساعی ویلایتین دیگر شهرلرینده طبیعی فلاکتین فسادلار تؤرتدیینی وورغولاییب:
«آذرشهرده ۷ آوتومبیل سئل-داشقین سولارینین آلتیندا قالیب، حاضردا ایتکین دوشن آوتومبیل سرنیشینلری آختاریلیر. طبیعی فلاکت ماراغا، بیناب و سراب شهرلرینده ده باش وئریب، لاکین ان چوخ عجبشیر و آذرشهر شهرلرینه زیان دییب».
ساعینین سؤزلرینه گؤره، طبیعی فلاکت نتیجهسینده بؤلگهیه دیمیش مادی زیانین هجمی هلهلیک معلوم دئییل.
آذرشهر قیزیل آی پارا جمعیتینین ریسی ایسه بیلدیریب کی، خیلاص ائدیجیلر ۳ نفری سئلدن قورتاریب، سولار آلتیندا قالان «پژو» مارکالی آوتومبیلین ۳ سرنیشینینین آختاریشی ایسه داوام ائدیر.
آذرشهر ایجرا حاکیمیتی باشچیسی (فرماندار) آللاهیاری دئییب کی، آذرشهر، گوگان، ماماغان، تیمورلو و اطراف کندلر داشقین سولارینین محاصرهسیندهدیر: «سئل آزرشهرین گلزار منطقهسینده بیر نئچه آوتومبیلی آپاریب. اؤلنلر بارهسینده هلهلیک دقیق معلومات یوخدور. خیلاص ائدیجی قروپلار ایسه طبیعی فلاکت بؤلگهسینین بوتون یئرلرینه گؤندریلیب».
شرقی آذربایجان یول پلیسی ایدارهسینین ریسی پولکوونیک جواد ناموران ایسه آذرشهر-عجبشئر یولوندا یئرلشن قاضی جهان کؤرپوسونون هلهلیک باغلاندیغینی اعلان ائدیب: «بؤلگهده تهلوکه احتیمالی وار، داشقین تکرارلانا بیلر. اونا گؤره ده قاضی جهان کؤرپوسو نؤوبتی خبردارلیغا قدر باغلی قالاجاق».
عجبشیر ایجرا حاکمیتی باشچیسینین (فرماندار) سؤزلرینه گؤره، بو شهرده باش وئرن داشقین نتیجهسینده ۳ نفر اؤلوب، ۱۲ نفر ایسه ایتکین دوشوب. هلهلیک ایتکین دوشهنلرین تالعیی بارده هئچ بیر معلومات یوخدور. «اؤلنلردن بیری قادین، ایکیسی ایسه کیشیدیر، اونلارین جسدی عجبشیر خسته خاناسینا آپاریلیب»، - دئیه فرماندار بیلدیریب.
بعضی منبعلر ایسه عجبشیرده طبیعی فلاکت نتیجهسینده ۱۲ نفرین اؤلدویونو و ۴۰ نفرین ایتکین دوشدویونو ادعا ائدیب.
تاریخ
2017.04.15 / 11:33
|
مولف
Axar.az
|