خودآفرین سووارما سیستمینین ایشه سالینماسی نتیجه‌سینده ۲۵ مین یئنی ایش یئرینین آچیلاماسی پلانلاشدیریلیر کی، بونونلا دا بؤلگه‌ده ایشسیزلیک پروبلمی بیردفعه‌لیک حل اولوناجاق.

آخار. آذ خبر وئریر کی، بو باره‌ده معلوماتی اردبیل رگیونال سو ایداره‌سینین دیرکتورو عسگر سلیمان‌زاده بیلدیریب.

لاییحه‌یه اساساً، گئرمی شهری ایچمه‌لی سو ایله تام تامین اولوناجاق. بونون اوچون یئنی سو تمیزله‌مه قورغولاری قوراشدیریلاجاق. انقوت و موران شهرلرینین ده ایچمه‌لی سو پروبلمی حل اولوناجاق. بو مقصدله تازه‌کند سو بندی بو ایلین اورتالاریندان اعتباراً سو ایله دولدورولاجاق، اطراف کند و شهرلر همین بند واسطه‌سی ایله سویلا تامین ائدیله‌جک.

اردبیلین شیمال بؤلگه‌سین‌ده ده ایمارت سو بندینین تیکیلیسی داوام ائتدیریلیر. بو ایلین سونونا قدر بو بندین ایشلرینین یئکونلاشماسی گؤزلنیلیر.

سلیمانزادنین سؤزلرینه گؤره، پایاب لاییحه‌سی اساسین‌دا خودآفرین بندی سرحد لاییحه‌لردن بیریدیر و بو لاییحه‌نین سونوندا مغانین ۶۲ مین هکتار اراضی‌سی سووارما سیستمی ایله تجهیز اولوناجاق. لاییحه‌نین ۵۲ کیلومتری شرقی آذربایجان ویلایتینین، ۹۰ کیلومتری ایسه اردبیل ویلایتینین اراضی‌سینه دوشور.

لاییحه چرچیوه‌سینده نظرده توتولان ایشلرین ۵۰ فایزی تماملانیب. ایشلرین سونوندا ۲۶ مین نفر ایشله تامین اولوناجاق.

همچینین، بندین اوزرینده قوراشدیریلان الکتیک ایستانسییاسی بؤلگه‌نین الکتریک انرژی‌سی ایله تامین ائدیلمه‌سینده اولان پروبلملری آرادان قالدیراجاق.