تیکانتپه شهرینین امام جومعه‌سی عیسی برادری تمثیل ائتدیی شهری کورد شهری کیمی تقدیم ائد‌ن مهابادین (سویوقبولاق) میلت وکیلی جلال محمودزاده‌یه جاواب وئریب.

آخار. آذ خبر وئریر کی، سون گونلر آغدره قیزیل معده‌نینده باش وئرن حادثه‌لردن دانیشان برادری سئچیلدیی دایریه عایید اولمایان مکاندان دانیشدیغینی بیلدیریب:

«مهابادین میللت وکیلی جناب جلال محمودزاده آغدره کندینین مسئله‌لرینه رئاکسییا وئریب. لاکین تیکانتپه جلال محمودزاده نین میلت وکیلی سئچیلدیی منطقه‌ده یئرلشمیر. اونون بو منطقه‌یه مداخیله ائتمه‌سی یاخشی حال دئییل».

عیسی برادری میللت وکیلینین اؤلکه پرزیدنتینه یازدیغی غرضلی و مقصدیؤنلو مکتوبوندان دا سؤز آچیب:

«جلال محمودزاده فهله‌لرین پروبلمینه باخماق بهانه‌سی ایله تیکانتپنین ایشلرینه ائله بیر شکیلده مداخیله ائتمه‌ملیدیر کی، بؤلگه‌ده اتنیک و مذهبلر آراسیندا اوچوروم یارانسین. مسئوللار و میلت وکیللری اهالینی تحریک ائد‌جک آچیقلامالار وئرممه‌لیدیر. اونلار اؤز چیخیشلاریندا یالنیز مسئله نین ماهیتیندن دانیشمالیدیرلار».

قید ائدک کی، تیکانتپه شهرینین آغدره کندینده بیر قروپ شخص قیزیل معدنی اطرافینا توپلاشیب، بوردا چالیشماق ایستدیکلرینی بیلدیریبلر. پلیس امکداشلاری ایسه ییغینجاغا مداخیله ائدیب، نتیجه‌ده قارشیدورما یارانیب.

جلال محمودزاده یارانان فورصت‌دن سوء-ایستیفاده ائد‌رک پرزیدنت حسن روحانییه حادثه ایله باغلی مکتوب یازیب. او، مکتوبدا تیکانتپه‌نی سرحدیانی و کورد شهری، اهالیسینی ایسه کورد کیمی تقدیم ائدیب. هالبوکی کوردلر بو بؤلگه‌یه سون ایللرده کؤچوبلر.