ایرانین بیر چوخ خسته خاناسی زلزله‌یه داواملی دئییل.

بو سؤزلری مسکن و شهرسازی تدقیقات مرکزینین رهبری محمد شکرچی زاده طبس زلزه‌له‌سینین ایلدؤنومو مناسیبتیله تشکیل ائدیله‌ن مطبوعات کنفران‌سین‌دا دئییب. او، اؤلکه خسته خانالارینین زلزله‌یه داواملی‌لیغی باره‌ده خبردارلیق ائدیب:

«اؤلکه خسته خانالارینین یاریدان چوخو زلزله‌لره قارشی دایاناقلی دئییل. اؤلکه‌ده هر ۱۰ ایلده بیر دفعه ۷ ریشتئردن چوخ زلزله باش وئریب. بو زلزله‌لرین ۱۰۰ مین نفردن آشاغی شهرلرده اوز وئرمه‌سین‌ده بیزیم بختیمیز گتیریب. ۱۳۹۶-جی ایلین آبان آیین‌دا کرمانشاهین سر پل زاهاب شهرین‌ده باش وئره‌ن زلزله تبریز و تهران کیمی بؤیوک بؤلگه‌لرده اولسایدی، چوخ سای‌دا ایتکی وئرردیک. کرمانشاه زلزله‌سین‌ده خسته خانالاردا محو اولدو، یارالیلارا خیدمت گؤستره بیلمه‌دیلر. سرپل زهابدا خسته خانالارین زلزله‌یه داواملی اولماماسی اؤلنلرین سایینین آرتماسی ایله نتیجه‌لندی. تهران خسته خانالارینین دا یاریدان چوخو زلزله‌یه داوام‌لی دئییل».