آنا صحیفه توپلوم |
جاری ایلین اؤتن دؤورو عرضینده ایرانلا آذربایجان آراسیندا تیجارت دؤورییهسینین ۷۰ فایزدن چوخ آرتماسی قارشیلیقلی علاقهلرین اینکیشافیندان خبر وئریر.
آخار. آذ خبر وئریر کی، بو سؤزلری ایرانین اقتصادی ایشلر و مالییه ناظری فرهاد دژپسند مطبوعاتا وئردیی آچیقلاماسیندا دئییب.
او بیلدیریب کی، ایرانلا آذربایجان سیغورتا ساحهسینده امکداشلیق علاقهلرینی گئنیشلهندیرهجک و بیرگه اینوئستیسییا فوندو یاراداجاق. سیغورتا ساحهسینده امکداشلیق علاقهلرینین قورولماسی وطنداشلارین و شیرکتلرین ایش قورماق ایستکلرینه کؤمکلیک گؤسترهجک. اونلارین املاکی و مالییه وسایتلرینه دؤولتلر زمانت وئرهجک. بو ایسه قارشیلیقلی سرمایه قویولوشونو آرتیراجاق.
ف. دژپسند ایکی اؤلکه آراسیندا نقلیات ساحهسینده امکداشلیغین داوام ائتدیینی وورغولاییب. قید ائدیب کی، «شیمال-جنوب» بین الخالق نقلیات دهلیزینین اساس کومپونئنتی اولان قزوین-رشت-آستارا (ایران)-آستارا (آذربایجان) دمیر یولونون چکیلیشی داوام ائدیر. بو یولون قزوین-رشت حیصهسی ایستیثمارا بوراخیلیب. رشت-آستارا حیصهسینده ایسه ایشلر داوام ائدیر.
اونون سؤزلرینه گؤره، قارشیداکی ایکی ایلده رشت-آستارا یولونون تیکینتیسی باشا چاتاجاق و ایرانلا آذربایجانین دمیر یولو سیستملری بیرلشهجک. بو دمیر یولونون ایستیفادهیه وئریلمهسی ایله هر ایکی اؤلکهنین غیری-نفت سکتورونون اینکیشافینا اساسلی تکان وئریلهجک.
ایرانلی ناظر اونو دا بیلدیریب کی، دؤولتلر آراسیندا بیرگه بین الخالق اینوستیسییا فوندونون یارادیلماسی مسئلهسینه باخیلیر.
ناظر بیلدیریب کی، آذربایجاندا فعالیت گؤسترهن ایران موسسیسهلرینین ساییندا دا آرتیم موشاهیده ائدیلیب.
«بو گون آذربایجان بازاریندا ۱۳۷۱ ایران موسسهسی فعالیت گؤستریر» - دئیهن ف. دژپسند یارادیلان بیرگه موسسهلره ده توخونوب. قید ائدیب کی، نفتچالاداکی آوتومبیل زاوودو فعالیتینی اوغورلا داوام ائتدیریر. زاوودون ایستحصال ائتدیی ماشینلار یئرلی و خاریجی بازارلارا چیخاریلیر. باکی یاخینلیغینداکی پیراللاهی قصبهسینده اجزاچیلیق زاوودونون تیکینتیسی آپاریلیر و بو بیرگه موسسه ده اوغورلا فعالیت گؤسترهجک. ایران آذربایجانی دوست و قارداش دؤولت حساب ائدیر، اقتصادی علاقهلرین داها دا گئنیشلهنمهسینده ماراقلیدیر.
تاریخ
2019.10.09 / 19:09
|
مولف
Axar.az
|