سون واختلار ایرانین آذربایجان رسپوبلیکاسین‌داکی سفیری عباس موسوی‌یه قارشی اؤز اؤلکه‌سینین مئدیا قوروملاری طرفیندن هجوملار آرتیب.

Axar.az خبر وئریر کی، سفیر باره‌سین‌ده سوسیال مئدیا و خبر سایتلاریندا تنقیدی یازیلار درج اولونور.

بو قبیل‌دن اولان نوبتی هجوم ایرانین آنالیتیک خبر پورتالی «بولتن نیوز» طرفیندن اولوب.

سایت عباس موسوینین سفیرلیک بیناسیندا حجابسیز آذربایجان‌لی خانیم ژورنالیسته مصاحیبه وئرمه‌سینی تنقید ائدیب.

«ایرانین آذربایجان رسپوبلیکاسین‌داکی سفیری سید عباس موسوینین اویغون اولمایان گئییم‌ده اولان قادین آپاریجینین یانین‌دا چکیلمیش فوتوشکلی کیبرمکان‌دا بؤیوک مذاکیره‌لره سبب اولوب. آپاریجینین بئله ایستی قارشیلانماسی و امام خمینی، انقلابین عالی لیدری و قاسم سلیمانینین شکلینین آلتیندا اوتوردولماسی و دیپلمات کیمی آذربایجان بایراغینین اونون یانینا قویولماسی بیر چوخ سرت و تنقیدی فکرلره سبب اولوب"،- سایت یازیب.

یازینین داوامیندا سفیرین بو حرکتینین انقلاب و اونون دیرلرینه، موسوینین شرف و لیاقتینه ضد اولدوغو بیلدیریلیب.

قید ائدک کی، بوندان اول آذربایجان‌دا آختاریشدا اولان و ایرانا سیغیناراق سپاه-ین حمایه‌سی آلتیندا فعالیت گؤستره‌ن «حسینیون» گروپلاشماسینا باغلی سوسیال مئدیا کاناللاری دا سفیره قارشی اتهاملار ایر‌لی سوروبلر.