آذربایجانین ورزقان بؤلگه‌سینده یئرلشه‌ن و تورکلره مخصوص سونگون مس معدنینین ایللیک گلیری ۸۰ تریلیون تومن (۱ میلیارد ۲۰۰ میلیون دلار) تشکیل ائدیر و بو گلیر کرمان ایالتینه داشینیر.

Axar.az خبر وئریر کی، بونو کلیبرین ایران پارلامنتینده‌کی نماینده‌سی بهنام رزوانی دئییب.

"بونون اوچون هئچ بیر اذیت بئله چکمیرلر، ساده‌جه کنسنتراتی تیرلارا یوکله‌ییب کرمان ایالتینه داشییرلار"،- ملت وکیلی بیلدیریب.

او، قانونلا سونگون مس معدنیندن الده ائدیله‌ن گلیرین ۱۰ فایزینین شرقی آذربایجان ایالتینین بودجه‌سینه علاوه ائدیلمه‌لی اولدوغو حالدا بونا عمل ائدیلمدیینی سؤیله‌ییب.

رزوانی معدنین گلیریندن شرقی آذربایجان ایالتینه ایللیک ۸ تریلیون تومن (۱۲۰ میلیون دلار) وئریلمه‌لی اولدوغو حالدا، دولت بودجه‌سیندن ایالته آیریلان ایللیک وسائطین ۲ تریلیون تومن (۳۰ میلیون دلار) اولدوغونا دقت چکیب.

"حاضردا قاراداغ بؤلگه‌سینین بیر چوخ کندلری یول، طب مرکزلری، مکتب، ایچمه‌لی سو چاتیشمازلیغیندان اذیت چکیر. ساده‌جه سونگون مس معدنینین ایالته وئریلمه‌لی اولان ایللیک گلیری ایله بوتون بونلاری حل ائتمک ممکوندور"،- کلیبرلی ملت وکیلی قید ائدیب.

قید ائدک کی، ورزقانین سونگون مس معدنی یاخین شرقین ان بؤیوک مس معدنی‌دیر.

سونگون مس معدنیندن الده اولونان محصول خام‌مال کیمی ایرانین دیگر بؤلگه‌لری، او جمله‌دن کرمان ایالتینه داشینیر. معدنی چالیشدیران شرکتین بانک حسابلاری و نتیجه اعتباری ایله پول دورییه‌سی ده کرمان و تهران ایالتلرینده‌دیر.