تاریخی منبع‌لرده بابک خرمی‌نین دقیق دوغوم تاریخی و گونو قید اولونماسا دا، غیری-رسمی و عنعنوی اولاراق، اونون دوغوم گونو هر ایل ۱ ایول تاریخین‌ده قید اولونور.

Kult.az خبر وئریر کی، تاریخ شناس‌لیق‌دا اونون ۷۹۸-جی ایلده اردبیل شهری یاخینلیغینداکی بیلالاباد کندین‌ده آنادان اولدوغو گمان ائدیلیر.

بابک (۷۹۸–۸۳۸) — ۹-جو عصرده عرب خلافتینه قارشی آذربایجان‌دا باشلانمیش خرمیلر حرکاتینین ان گؤرکملی رهبری و سرکرده‌سیدیر. او، خالقین آزادلیغی، مستقیل‌لییی و سوسیال عدالت اوغرون‌دا مبارزه‌نین سیموولو کیمی تانینیر.

خرمیلر حرکاتی سوسیال برابرسیزلییه و اجنبی (عرب) آغالیغینا قارشی یؤنلمیشدی. بابک ۸۱۶-جی ایلده حرکاتین لیدری سئچیلمیشدیر.

عصیانین اساس قالاسی و مرکزی آذربایجانین تاریخی اراضی‌سی، جنوبی آذربایجانین کلیبر بؤلگه‌سینده یئرلشن بزز قالاسی اولوب. بابک ۲۰ ایلده‌ن آرتیق بیر مدت‌ده خیلافتین سای‌سیز-حساب‌سیز قوشونلارینا قارشی مبارزه آپاریب و اونلاری دفعه‌لرله مغلوب ائدیب.

او، داغلیق اراضیلرین رلیفین‌دن مهارتله استفاده ائد‌رک پارتیزان محاربه‌سی آپاریب، عرب سرکرده‌لرینه جدی ضربه‌لر ووروب.

عرب خلافتی بوتون قوه‌لرینی سفربر ائد‌رک اوردو باش‌چی‌سی آفشینی آذربایجانا گؤندریب. اوزون و آغیر محاصره‌دن سونرا، ۸۳۷-جی ایلده بزز قالاسی سقوط ائدیب.

بابک خیانت نتیجه‌سینده اله کئچیریله‌رک عراقین سامرا شهرینه آپاریلیب و اونا تکلیف ائدیلن یوکسک وظیفه‌لری، خلیفه‌نین تکلیفلرینی رد ائتدیی اوچون ۸۳۸-جی ایلده خلافت طرفیندن اعدام ائدیلیب.

اشغال‌چی قوه‌لرین تاریخچیلرینین و دین تاجرلرینین باره‌سینده یازدیقلاری افطرا و بهتانلارا باخمایاراق، بابک خرمی آذربایجان تاریخ شناسلیغین‌دا خالقین ملی آزادلیق مبارزه‌سینین ان پارلاق سیمووللارین‌دان بیری کیمی قبول ائدیلیب، آذربایجان‌لیلارین ظلمه، عدالتسیزلیه و اشغال‌چیلارا قارشی مبارزه رمزینه چئوریلیب.

قید ائدک کی، اوزون ایللردیر جنوبی آذربایجان‌دا بابک خرمینین خاطره‌سینی آنماق و دوغوم گونونو قید ائتمک اوچون هر ایل ایون آیینین سونو و ایول آیینین اوللرین‌ده شرقی آذربایجان ایالتین‌ده یئرلشن تاریخی بزز قالاسینا کوتلوی یوروشلر تشکیل اولونور. بو تدبیرلر میللی اویانیش و اعتراض سیموولو اولاراق کئچیریلیر.

بو تدبیرلر خالق قهره‌مانینین خاطره‌سینی آنماقلا یاناشی، آذربایجان‌لیلارین ملی-مدنی حقوقلارینین طلب ائدیلمه‌سی آکسیاسی کاراکتری داشیییر.

چوخ سایدا فعال و یئرلی اهالی قالایا یوروش ائد‌رک، بورادا ملی شعیرلر اوخویور، موسیقیلر ایفا ائدیر و اعتراض شعارلاری سسلندیریرلر.

بو گونه کیمی همین دینج مدنی یوروشلرده اشتراک ائد‌ن یوزلرله انسان حبس ائدیلیب، اونلارلا شخصه قارشی موختلیف اتهاملار ایر‌لی سوروله‌رک باره‌لرین‌ده اوزون مدت‌لی حبس قرارلاری چیخاریلیب.