آذربایجان اوچون صلح آرتیق رئاللیقدیر.

Axar.az خبر وئریر کی، بو باره‌ده آذربایجان پرزیدنتی ایلهام علیئو ایولون ۱-ده باکیدا آوروپا کمیسیاسینین پرزیدنتی اورسولا فون در لینله مطبوعاتا بیاناتلا چیخیش ائدرکه‌ن بیلدیریب.

او قید ائدیب کی، اورسولا فون در لینله آذربایجانلا ارمنستان آراسیندا مناسبتلرین نرماللاشدیریلماسی پروسسلریندن صحبت ائدیبلر:

"فاکتیکی اولاراق صلحه نایل اولونوب. بیز آرتیق بونون خیرینی گؤروروک. بیز صلحون کاغذ اوزرینده اولمادیغینی نمایش ائتدیرمک اوچون بیر سیرا بیرطرفلی آددیملار آتدیق".

پرزیدنت خاطیرلادیب کی، آذربایجان اؤز اراضی‌سیندن ارمنستانا ماللارین گؤندریلمه‌سی اوچون بوتون محدودیتلری آرادان قالدیردی. ایلهام علیئو وورغولاییب کی، آذربایجان ارمنستانا نفت محصوللاری، او جمله‌دن بنزینین اخراجینا باشلاییب:

"بیر سؤزله بیز نمایش ائتدیریریک کی، بیزیم اوچون صلح آرتیق رئاللیقدیر. بیز صلح شرایطینده یاشاماغی اؤیره‌نیریک، چونکی بیز ۳۰ ایل عرضینده اشغال آلتیندا یاشامیشیق. بیز صلحو گوجله‌ندیرمک اوچون الیمیزدن گلنی ائتمه‌لییک کی، او ابدی صلح اولسون".