سوئد وطنداشی اولان و تهرانین ائوین حبس‌خاناسیندا اعدام حکمو آلتندا یاشایان گونئی آذربایجانلی عالیم احمدرضا جلالی سوئدین باش ناظری اولاف کریسترسونا مراجعت ائدیب.

Axar.az خبر وئریر کی، بو باره‌ده انسان حاقلاری تشکیلاتلاری معلومات یاییب.

او، یایدیغی سس یازیسیندا ایرانلا سوئد آراسیندا باش توتان محبوس مبادله‌سیده اؤزونون آدینین یئر آلمادیغینا گؤره باش ناظری تنقید ائدیب.

"من ۸ ایل ۲ آیدیر ساخلانیلدیغیم ائوین حبسخاناسی‌نین قورخونج تک‌آداملیق کامراسیندان سنه مراجعت ائدیب و دئییرم کی، مندن اوز چئویرمه‌یی قرارا آلدینیز. منی اعدام تهلوکه‌سی ایله قارشی-قارشییا قویوب و اعدام حکمومون دییشدیریلمه‌سینه گؤره مبارزه آپارمادینیز"،- آذربایجانلی عالیم دئییب.

جلالی ایکی سوئد وطنداشی‌نین بو اولکه‌ده حبس‌ده اولان ایرانلی کئچمیش پروکورور کمک‌چیسی حمید نوری ایله دییشدیریلمه‌سینه توخونوب و بو محبوس مبادله‌سی زمانی اؤزونون ایران حبس‌خاناسیندان گئری آلینماماسینی آیری-سئچکیلک نمونه‌سی آدلاندیریب.

ایکی گون اول احمدرضا جلالی‌نین حیات یولداشی ویدا مهران‌نییا دا، سوئدین باش باش ناظرینه عنوانلادیغی مراجعت‌ده اونو تنقید ائدیب، جلالییه قارشی آیری-سئچکی‌لیک ائدیلدیینی بیلدیریب.

قید ائدک کی، سوئد وطنداشی اولان گونئی آذربایجانلی احمدرضا جلالی ۲۰۱۶-جی ایلین آپریل آیین‌دا تهران و شیراز اونیورسیتتلرینین دعوتی ایله علمی کنفرانسا قاتیلماق اوچون ایرانا سفر ائتدیکدن سونرا حبس ائدیلیب.

۲۰۱۷-جی ایلین سنتیابر آییندا تهران انقلاب محکمه‌سی آذربایجانلی عالیمی "اسرائیله جاسوسلوق" اتهامینا گؤره اعداما محکوم ائدیب و قرار داها سونرا ایران عالی محکمه‌سی طرفیندن ده تصدیق اولونوب.

جلالی باره‌سینده ایره‌لی سورولن اتهامی قبول اتمه‌ییب.