اسلام دینینین طریقتلریندن اولان و ایران‌دا فعالیتینه قاداغا قویولان اسماعیلیه شیعه‌لرینین ۴۹-جو امامی کریم آغا خان بو گون سحر ساعتلاریندا پرتقالیانین پایتختی لیسبون‌دا ۸۸ یاشیندا وفات ائدیب.

Axar.az خبر وئریر کی، بو باره‌ده اونون تاسیس‌چی و رهبری اولدوغو "آغا خان انکشاف شبکه‌سی" معلومات یاییب.

بیلدیریلیب کی، اونون واریثینین کیم‌لییی یاخین واختلاردا اعلان ائدیله‌جک.

دنیادا تقریباً ۱۲ میلیون نفر اولدوغو تخمین ائدیلن اسمائیلی دینینین آردیجیللاری حساب ائدیرلر کی، شیعه‌لرین یئددینجی امامی جعفر صادق‌دن سونرا اونون اوغلو اسماعیل بین جعفر اونون واریثی و شیعه‌لرین سککیزینجی امامی‌دیر.

اسماعیلی دینینین آردیجیللارینین اکثریتی هندیستان، پاکستان، افغانیستان و تاجکیستان‌دا یاشاییر و اونلارین روحانی لیدرلرینین اسلام پیغمبری محمدین نسلین‌دن اولدوغونا اینانیرلار.

کریم آغا خان ۱۹۳۶-جی ایلده ایسوئچره‌نین جنوره شهرینده آنادان اولوب، ۲۰ یاشین‌دا و باباسین‌دان سونرا ۱۹۵۷-جی ایلده ۴-جو آغا خان کیمی اسماعیلی دینینین امامی اولوب.

۱۹۶۷-جی ایلده او، "آغا خان انکشاف شبکه‌سینی" قوروب. اونون فعالیت استقامتلریندن بیری ده آسیا و آفریکادا قیدا چاتیشمایان اراضیلری ارزاق ایله تعمین ائتمک و طبیعی فلاکتلرده یاردیم گؤسترمک کیمی هومانیتار ایشلر اولوب.

ثروتینین ۱۳ میلیارد دلار جیوارین‌دا اولدوغو دئییله‌ن آغا خان ان زنگین مسلمان کاپیتالیستلریندن بیری ایدی. اونون ایکی شخصی طیاره‌سی، یوزلرله یاریش آتلاری، بیر سیرا دامازلیق تصروفاتلاری، ساردینییا آداسیندا اکسکلوزیو یئلکنلی یاختا کلوبو و پاریس یاخینلیغینداکی دبدبه‌لی ملک وار.

اینگیلتره و پورتقالیا وطنداشی اولان دینی شخصیت بریتانیا کرال عائله‌سی ایله ده یاخین علاقه‌ده اولدوغونا، بو عائله عضوو ایله ائولندیینه گؤره، کرالیچا ۲-جی الیزابت طرفین‌دن "اعلاحضرت" لقبی آلیب.

میلیتجه تورک اولان کریم آغا خان، فتحعلی شاه قاجارین نوه‌لریندن اولدوغونا گؤره، بیر چوخ سندلرده و مراجعتلرده اونا "شاهزاده" ده دئییلیب.

او، دنیانین بیر چوخ نفوذلو سیاستچیلری، مشهور ایش آداملاری و دولت باشچیلاری ایله یاخین دوست اولوب.