تهرانین ائوین حبس‌خاناسین‌دا ساخلانیلان اعداما محکوم ائدیلمیش ۵ سیاسی محبوسلا علاقه کسیلدیی اوچون، اونلارین قفیل اعدام ائدیلجیی باره‌ده ناراحاتلیقلار آرتیب.

Axar.az خبر وئریر کی، بو باره‌ده اینسان حاقلاری تشکیلاتلاری معلومات یاییب.

معلوماتا گؤره، ائوین حبس‌خاناسی رهبرلیینین گؤستریشی ایله محمد تقوی، پویا قبادی، وحید بنیامریان، علی‌اکبر (شاهرخ) دانشورکار و بابک علیپورون عائله‌لری ایله گؤروشو و تلفن دانیشیغینا قاداغا قویولوب.

قید ائدک کی، آدی چکیلن محبوسلار حکومته مخالف "خالق مجاهدلری تشکیلاتی"نا عضو اولماق‌دا گناهلاندیریلیبلار.

اؤتن هفته اعدام اؤنجه‌سی حاضرلیق اوچون اونلارین ائوین حبسخاناسین‌دان قیزیل‌حسارا کؤچورولمه‌سی زمانی حبسخانادا قارشی‌دورما یارانیب.

محبوسلار اعداما محکوم ائدیله‌نلرین کؤچورولمه‌سینه مانع اولماغا چالیشدیقلاری اوچون حبس‌خانایا خصوصی قوه‌لر جلب ائدیلیب، نتیجه‌ده بیر نئچه اعتراضچی محبوس یارالانیب.