روسیادا سیاستچیلره ائتدیکلری زارافاتلارلا مشهورلاشان ووان و لکسوسون بو دفعه‌کی هدفی ایران شاهینین اوغلو، ولیعهد رضا پهلوی اولوب.

Axar.az خبر وئریر کی، کمدییاچیلار گؤرونتولو زنگ ائد‌رک اؤزلرینی رضا پهلوییه آلمانیا کانسلری فریدریخ مرزین مشاورلری کیمی تقدیم ائدیبلر. رضا پهلوی اونلارین تقدیم ائتدیکلری کیملییه اینانیب.

ساچ و بیغ قویاراق اؤزونو آدولف هیتلره بنزه‌دن کمدیاچی رضا پهلوییه «سیزه بیلدیریم کی، منیم بابام سیزین آتانیزی تانییردی، او، آلمان اردوسون‌دا خدمت ائدیب، ۱۹۴۰-جی ایللرده تهران‌دا آگنت کیمی فعالیت گؤستریب» دئییب.

کمدیا استاسینین نه گؤرونوشو، نه دئدیکلری، نه ده آدینین آدولف اولماسی رضا پهلوینی شبهه‌یه سالیب، او ایناملا چیخیشینا داوام ائدیب.

دانیشیق زمانی کمدیاچی آلمانیانین ایرانا قارشی حربی عملیاتلارا حاضیرلاشدیغینی بیلدیریب:

«سیزی ایناندیریم کی، آلمان اردوسو بو دقیقه ایرانا حربی عملیاتا باشلایا بیلر. بیزیم «تاوروس» راکتلریمیز وار و کشفیاتیمیز ایرانی بمباردمان ائتمه‌یه حاضردیر».

رضا پهلوی ایسه بو سنارییه ایناناراق آوروپانین ایرانا قارشی داها سرت مؤقع توتمالی اولدوغونو دئییب:

«تکجه اسرائیللیلر و آمریکالیلار دئییل، داها چوخ انسان بو سلیب یوروشونه قاتیلمالیدیر. آلمانیانین بئله بیر قطعی مؤقع‌ده اولماسیندان ممنونام».