قیرغیزیستانین تحصیل ناظری دوقدورکول کندیربایئوا آذربایجانین بیشکک‌ده‌کی سفیری لطیف قندیلوولا گؤروشوب. سفیر گؤروش زمانی آذربایجان دیلینین تدریسی اوچون قیرغیزیستانا گلمیش معلم اولکر وئردیئوانی ناظره تقدیم ائدیب.

Axar.az تلگراف-ا استنادلا خبر وئریر کی، بو باره‌ده قیرغیزیستان مطبوعات معلومات یاییب.

بیلدیریلیب کی، آذربایجان‌لی معلمین اؤلکه‌یه گلیشی قیرغیزیستان و آذربایجان آراسیندا اقتصادی و هومانیتار امکداشلیق اوزره حکومتلرآراسی کمیسیانین قیرغیزیستان و آذربایجان دیللری معلملرینین قارشی‌لیقلی مبادله‌سی ایله باغلی راضیلاشمالاری چرچیوه‌سینده تشکیل اولونوب:

«اولکر وردیئوا بیشکک‌ده نظامی گنجوی آدینا ۱۰۳ نمره‌لی عموم تحصیل مکتبین‌ده و حیدر علیئو آدینا ۲۰ نمره‌لی مکتب‌ده آذربایجان دیلینی تدریس ائد‌جک. اؤز نوبه‌سین‌ده، قیرغیزیستان‌دان اولان معلم آذربایجانا گئده‌جک و بورادا قیرغیز دیلی و قیرغیز ادبیاتینی تدریس ائد‌جک.

کندیربایئوا آذربایجان‌لی معلمه قارشی‌داکی فعالیتین‌ده اوغورلار آرزولاییب و قید ائدیب کی، تحصیل و مدنیت مبادله‌لری ایکی اؤلکه آراسیندا قارشی‌لیق‌لی آنلاشمانین اینکیشافینا و دوستلوق مناسبتلرینین محکمله‌نمه‌سینه خدمت ائدیر.

قندیلوو قیرغیزیستان و آذربایجان خالقلارینین اینتگراسییاسین‌دا دیل و مدنیتین رولونو وورغولاییب.

حاضردا بیشکک‌ده آذربایجانین مالیه دستیی ایله تیکیلمیش ایکی مکتب - نظامی گنجوی آدینا ۱۰۳ نمره‌لی مکتب و حیدر علیئو آدینا ۲۰ نمره‌لی مکتب فعالیت گؤستریر. اونلار ۲۰۲۲-جی ایلده آذربایجان پرزیدنتی الهام علیئوین قیرغیزیستانا سفری زمانی آچیلیب.

بوندان علاوه، آذربایجانین آغدام رایونونون خیدیرلی کندینده قیرغیزیستانین آدیندان «آیکول ماناس» مکتبی تیکیلیب. مکتبین آچیلیش مراسیمینده قیرغیزیستان و آذربایجانین پرزیدنتلری سادیر ژاپاروو و الهام علیئو اشتراک ائدیبلر».