آذربایجان پرزیدنتی ایلهام علیئو ارمنیستانلا صولح مقاویله‌سی ایمضالاماغا تلسمیر. چونکی او، باشا دوشور کی، هئچ بیر سند امضالامادان فاکتیکی مقصدلره نایل اولماق اوچون هله ده اهمیت‌لی رسورسو وار. آذربایجان بو مقصدلره دئ-فاکتو نایل اولماغا و یالنیز بوندان سونرا اونلاری مقاویله‌ده تثبیت ائتمه‌یه چالیشیر.

Axar.az خبر وئریر کی، بونو ارمنی سیاسی ایستراتگ ویگن آکوپیان دئییب.

آکوپیان قید ائدیر کی، قاراباغ‌دا سپارات‌چیلارین یاراتدیغی قوروملارین لغوی ایله باغلی بوتون بیاناتلار، زنگزور دهلیزی ایله علاقه‌دار مسئله‌لر هله یولون یاری‌سی‌دیر:

«علیئو تلسمه‌یه‌جک. باشلانغیج اوچون قاراباغدا «دؤلت قوروملارینین» لغوی ایله باغلی آذربایجانین طلبلرینین یئرینه یئتیریلمه‌سی ایله اوزلشجییک».

او ادعا ائدیب کی، قاراباغدا سپارات‌چیلارین آتشکس رئژیمینی پوزماسی ایله باغلی بوتون بیاناتلار اصلین‌ده باکینین اونلارا قارشی آنتی‌ترور عملیاتی باشلاماق اوچون بیر سبب‌دیر:

«پاشینیانین آذربایجانین ۸۶،۶ مین کوادراتمتر چرچیوه‌سینده اراضی بوتؤولویونو تانینماسی باکییا اؤلکه قانونلارینین قاراباغا دا شامیل ائدیلمه‌سینی بیان ائتمه‌یه اساس وئریر. بیلدیریله‌جک کی، آذربایجان‌دا هئچ بیر یئرده پارلامنت و یا پرزیدنت یوخدور، پلیسین ایستاتوسو باشقادیر، اونا گؤره ده قاراباغدا دا بو باش وئرمه‌مه‌لیدیر. نؤوبتی مرحله‌ده قاراباغین ارمنی ساکینلری آذربایجان پاسپورتلارینی آلمالی اولاجاقلار»، - او بیلدیریب.