بو گون خوجاوند رایونونون قاراکند کندی اوزرینده آذربایجانا مخصوص "می-۸" هلیکوپترینین ارمنیلر طرفیندن وورولماسیندان ۳۲ ایل اؤتور.

Axar.az خبر وئریر کی، ارمنیستان سلاح‌لی بؤلمه‌لری طرفیندن ۱۹۹۱-جی ایل نویابرین ۲۰-ده هلیکوپترین وورولماسی نتیجه‌سینده آذربایجانین بیر چوخ دولت خادملری و ژورنالیستلر هلاک اولوبلار.

۱۹۹۱-جی ایل نویابرین ۷-ده باکی‌دا قاراباغ‌داکی وضعیتی مذاکره ائتمک مقصدیله قازاخیستان، آذربایجان، تورکمنیستان، روسیا و ارمنیستان نماینده‌لرینین گؤروشو کئچیریلیر. نماینده‌لر خانکندینه گئتمه‌یه و حادثه‌لری اؤز گؤزلری ایله گؤرمه‌یه راضیلاشیرلار.

۱۹۹۱-جی ایل نویابرین ۱۸-ده میخایل قورباچووون شخصی کمکچی‌سی کرملدن باکییا زنگ ووراراق آذربایجان رسپوبلیکاسینین داغلیق قاراباغ رهبرلییندن خواهش ائدیر کی، تهلوکه‌سیزلیک شوراسینین نؤوبتی اجلاسینی داغلیق قاراباغدا کئچیرسین، چونکی اراضیده‌کی تورپاق ادعاسیندا اولان ارمنی لیدرلرینین و مسکوا نماینده‌لرینین ده بو اجلاسدا اشتراکی نظرده توتولور. بو تلفون زنگیندن سونرا باکی‌دا سیاهی ترتیب اولونور. سیاهییا ویکتور پولیانیچکو رهبرلیک ائتمه‌لی ایدی. نماینده‌لر آنجاق گوج ناظیرلیکلریندن و تهلوکه‌سیزلیک شوراسینین رهبر ارگانلاریندان عبارت اولمالی ایدی.

رسمی مسکوا اجلاسدا دولت کاتبی توفیق اسماعیلوو و باش پروکورور عصمت قاییبووون حکما اشتراکینی خواهش ائدیر. ۱۹۹۱-جی ایل نویابرین ۱۹-او ساعت ۱۹:۰۵-ده سیاهی ترتیب اولونور. سیاهییا ویکتور پولیانیچکونون باشچی‌لیق ائتمه‌سی قوه‌ده قالیر. آنجاق ۱۹۹۱-جی ایل نویابرین ۱۹-دا گئجه‌دن خیلی کئچمیش سیاهی تزه‌لنیر. ویکتور پولیانیچکونون، گوج ناظیرلیکلریندن سئچیلمیش شخصلرین آدلاری سیاهی‌دان چیخاریلیر. میللت وکیللری واقیف جعفروو و ولی ممدوو سیاهییا داخل سالینیر. توفیق اسماعیلوو ترتیب اولونموش سیاهییا رهبرلیک ائتمه‌لی، آغدام‌دا تهلوکه‌سیزلیک شوراسینین سیار اجلاسی کئچیریلمه‌لی ایدی.

۱۹۹۱-جی ایل نویابرین ۲۰-ده ساعت ۱۲:۵۷-ده آغدام اوچوش زولاغینداکی می-۸ تیپلی ایکی وئرتولیوتون (۶۹ و ۷۲ نمره‌لی) یاناجاق باکلاری دولدورولور. می-۸ ان۶۹ وئرتولیوتو اساس وئرتولیوت اولمالی، ایکینجی وئرتولیوت - می-۸ ان۷۲ ایسه بیرینجینی مشایعت ائتمه‌لی ایدی. اما ایکینجی وئرتولیوت تهلوکه‌سیزلیی تامین ائدیلمه‌دن ۱۳:۴۸-ده بیرینجینین یئرینه هوایا قالخیر. همین عرفه‌ده گولابلی و یئنی‌کند استقامتلرینده حربی ماشینلاردا قورولموش (ام-۱۶-۲۶ و ام.اس-۲۲-۲۲ نمره‌لی) و آغدام، خوجالی هوا لیمانلارینین اوچوش و ائنمه زولاقلارینی نظارته گؤتورن رادارلار واسطه‌سیله ساعت ۱۴:۰۵-ده آغدام‌دان قاراکند استقامتینه اوچان می-۸ ان۷۲ وئرتولیوتو ایله رابطه علاقه‌لری کسیلیر. بو باره‌ده معلومات خوجاوند استقامتینه اؤتورولور، لاکن تؤره‌دیلن فاجعه حاقیندا ایلکین معلومات تقریباً آلتی ساعت سونرا وئریلیر. حسابلامالارا گؤره، قاراکند اوزرینده ۳۰۰ متر یوکسکلیکده اوچان می-۸ ان۷۲ وئرتولیوتو ۱۹۹۱-جی ایل نویابرین ۲۰-ده ساعت ۱۴:۴۲ دقیقه‌ده وورولوب.

هلاک اولانلار آراسیندا دولت کاتبی توفیق اسماعیلوو، باش پروکورور عصمت قاییبوو، دولت مشاوری، سابق داخلی ایشلر ناظری محمد اسدوو، میللت وکیللری واقیف جعفروو، ولی ممدوو، باش ناظرین معاونی زولفو حاجییئو، پرزیدنت آپاراتینین شعبه مدیری، ژورنالیست عثمان میرزیئو، قازاخیستان داخلی ایشلر ناظرینین معاونی سانلال سریکوو، آذربایجان دولت تلویزییاسینین ژورنالیستی عالی مسطفی‌یئو ده اولوب. عمومی‌لیکده قضا نتیجه‌سینده ۲۲ شخص هلاک اولوب.