بو گون نوروزون ایکینجی - اود چرشنبه‌سی‌دیر.

Axar.az خبر وئریر کی، اود چرشنبه‌سی نوروز بایرامی عرفه‌سینده کئچیریله‌ن ایکینجی چرشنبه‌دیر.

اود تورکون آغلیندا، دوشونجه‌سینده مقدسلیک رمزی کیمی یاشاییب، بو رمزی‌لیک گونوموزه کیمی گلیب چیخیب. اود چرشنبه‌سینین ماهیتینده اودون مقدس ساییلماسی، اونون انسانی هر جور پیسلیکلردن، شردن تمیزلیجیینه، خیرین قلبه چالاجاغینا اینام ایفاده اولونور. بو چرشنبه قدیم انسانلارین گونشه، اودا اولان مقدس اینامیندان ایر‌لی گلیر. عادت-عنعنه‌یه گؤره، بو گون تونقال قالاییب، آلوون اوزریندن توللانماقلا داخلده اولان بوتون چیرکابی و آزار-بئزارلاری یاندیریرلار.

دیگر چرشنبه‌لرده اولدوغو کیمی، اود چرشنبه‌سینده ده قازانلار قاینامالی، اوجاغین اوستو بوش اولمامالی‌دیر. بو چرشنبه‌ده اودون، تونقالین یاندیریلماسی همین ایلین ایستی، برکتلی کئچمه‌سینه اشاره‌دیر. هله قدیم دؤورلردن انسانلار اودو قورویوب، اودا حرمت ائدیبلر. قالانان تونقال ایسه همیشه نیه‌سه اشاره اولوب. بونو «کتابی-دده قورقود» داستانیندان دا آیدین گؤرمک اولار. زردوشتلوکدن هله چوخ اول انسانلار طبیعتی جانلاندیران، تورپاغی ایسیدن گونشین یئرده‌کی سیموولو اولان اودو تصورلرینده رمزلشدیریبلر. بئله بیر اعتقاد یارانیب کی، انسانلار گونشی و اودو نه قدر عزیزله‌ییب اوخشاسا، طبیعت او قدر تئز ایسینر، آداملارا خوشبخت‌لیک گتیرر.

قید ائدک کی، یئل چرشنبه‌سی مارتین ۱۲-ده، ایل‌آخیر - تورپاق چرشنبه‌سی ایسه مارتین ۱۹-دا قید اولوناجاق.