آنا صحیفه گوندم |
ایران و روسییانین آپرئلدهکی بو گؤروشدن سونرا ارمنیستانا مناسیبتی جدی شکیلده دییشه بیلر. چونکی اونلار رگیوندا خاریجی قوهلرین اولماسیندان چوخ ناراحاتدیر.
بو سؤزلری Axar.az-آ پولیتولوگ تراب رضایئو ۵ آپرل ۲۰۲۴-جو ایلده بروکسلده کئچیریلمهسی گؤزلهنیلهن ارمنیستان-آمریکا-آوروپا بیرلیییی کنفرانسی ایله باغلی آچیقلاماسیندا دئییب.
اونون سؤزلرینه گؤره، گؤروش آرتیق ایرانی ناراحات ائتمهیه باشلاییب:
«ایران قونشولوغوندا ناتو، آمریکا حربی بازاسینین قورولماسیندان احتیاطلانیر. طبیعی کی، ۵ آپرل گؤروشوندن ده چوخ ناراحاتدیر. ایران و ارمنیستان آراسیندا واختیله موجود اولان سیخ مناسیبتلرده حاضردا گرگینلیک سئزیلیر. بو یاخینلاردا ایران ارمنیستانا حربی اتفاق تکلیف ائتمیشدی. آچیق شکیلده دئمیشدیلر کی، ارمنیستان ایرانلا حربی اتفاقا گؤره غربین تضییقیندن قورخورسا، تهران ایروانی رسمی مقاویله امضالانمادان دا سلاح-سورات، تعلیم و دیگر حربی واسطهلرله تهجیز ائده، حربی یاردیملار گؤستره بیلر. سون واختلارا کیمی ارمنیستانین سلاحلا تجهیز اولونماسیندا دا ایران واجیب رول اویناییب. روسییادان، هیندیستاندان گلن سلاحلارین ایران اراضیسیندن کئچیریلمهسینده فعال اشتراک ائدیب، اؤز حربی صنایعسینه عایید راکتلر باغیشلاییب. آذربایجان آنتیترور عملیاتی آپاردیغی دورده ارمنیستانین آمریکا ایله ایرانین یاخینلیغیندا ۹ گونلوک اورتاق حربی تعلیملر کئچیرمهسیندن سونرا تهرانین ریتوریکاسی سرتلشمهیه باشلادی. بونون آردینجا ایسه ارمنیستاندا ایران علیهینه تبلیغات گئنیشلندی. مئدیادا ایرانا قارشی یازیلار یازیلدی. ارمنیستان رهبرلییی ایرانین زنگزورلا باغلی موقعینی ایروانین داخلی سیاستینه قاریشماق کیمی قلمه وئردی، ایرانین اؤز حربی موجودلوغونو اوردا یئرلشدیرمک تکلیفینی تهدید کیمی قبول ائتدی. اودور کی، ایروان دایانمادان ایرانا قارشی آنتیتبلیغات ماشینینی ایشه سالمالی اولدو. بئله اولدوقدا ایران رهبرلییی ارمنیستانا سئچیم ائتمهلی اولدوقلاری ایله باغلی سیگناللار وئردی. یعنی، یا غرب، یا ایران. گؤرونور، ارمنیستان طرفی بو مئساژلاردان نتیجه چیخارمیر. اؤز ایستراتژی پلانینا صادقدیر. آمریکا و آوروپا بیرلییی ایله بیرگه اوچطرفلی سامیت ده بونو دئمهیه اساس وئریر».
پولیتولوگ بیلدیریب کی، تهران بروکسل گؤروشو ایله باغلی ایروانا معین خبردارلیغینی ائدیب و ایکی اؤلکهنین گلهجک مناسیبتی آپرلدن سونرا دقیقلشهجک:
«ایران ایلکین تهدیدلره باشلاییب. مطبوعات واسطهسی ایله ایروانا چاتدیریر کی، لازیم گلرسه، ارمنیستانی بلوکادادا ساخلایا، اوکیانا چیخیشینا انگل اولا، هیندیستان کیمی اؤلکهلردن حربی یوکلرین داشینماسینا پروبلم یارادا بیلر. ایندیکی حالدا ارمنیستان ایرانی هانسیسا شکیلده گؤروشلرله، تماسلارلا یومشاتلماغا چالیشاجاق و تهرانین موقعی یومشالدیقدان سونرا ایسه یئنه ده اؤزونون گئوسیاستینه صادق قالاجاق».
تاریخ
2024.04.01 / 11:01
|
مولف
وصاله ایسگندرووا
|