چاغداش تاریخ‌ده بشار اسد یاریم عصردن آرتیق بیر حاکمیتین داوامچی‌سی و سون اون دؤرد ایلده ایران (و سونرادان روسییانین) قطعی دستیی ایله اؤز خالقینی اؤلدوره‌ن لیدر کیمی یاددا قالاجاق.

او، میلیونلارلا اینسانی ائوسیز و کؤچکون ائتدی، یوز مینلرله گوناه‌سیز اینسانی اؤلدوردو و اون مینلرله سوریا وطنداشینی و مخالیفتینی قورخونج زیندانلاردا ایشگه‌نجه‌یه معروض قویدو.

معمر قزافی عرب لیدرلرینین گؤروشلرینین بیرینده گوجونون زیروه‌سین‌ده اولان لیوییا (لیبی)، مصر، تونس و سوریانین نوبتی هدف اولاجاغینی بیلدیره‌نده و بیر نوع سویداشلارینا خبردارلیق ائد‌نده، گنج بشار اسد تکبرله گولومسییردی.

محافظه‌کار پولکوونیک معمر قزافی، دیگر عرب لیدرلری کیمی، دیپلماتیک اتیکته عمل ائتمیردی. ظلم‌کارلیغیندان و آوتوکراتیاسین‌دان آسیلی اولمایاراق، بعضا ساده گؤرونه‌ن، اما دوروست و دوزگون اولان شئیلر دئییردی.

۲۰۰۸-جی ایلده دمشق‌ده عرب لیدرلرینین گؤروشونده صدامین اعدامینا توخونارکه‌ن دئمیشدی کی، عرب لیدرلرینی اعدام ائدیرلر، اؤلدورورلر؟

سونرا سالن‌دا ایلشن عرب لیدرلرینه مراجعت ائد‌رک دئمیشدی کی، نوبه سیزین‌دیر!

قزافی سببین آرخاسینجا گئتمه‌دی، گئتسه‌یدی، بلکه ده اؤزونو قورویا بیلردی. اونون گوله‌ن همکارلاری ایسه نه همین گون، نه قزافی اؤلدورولدوکدن سونرا بئله بیر عاقبتله قارشیلاشاجاقلارینی دوشونوردولر.

صدامین اعدامیندان درس آلمادیقلاری فاکت‌دیر. طبیعی کی، صدام و دیگر لیدرلر خالقین دستیین‌دن محروم اولدوقدان سونرا اعدام ائدیلدی و یا اوزاقلاشدیریلدیلار. خالقین دستیی دایم حاکم دایره‌لرین ایسته‌نیله‌ن تخریباتدان قورونماسی و ساغ قالماسی اوچون یگانه تأمینات ساییلیر.

فاکت بودور کی، اقتدار و گوج او قدر کور و کاردیر کی، دیکتاتورلار حقیقتلری گؤره بیلمیر. گؤره‌نده ایسه چوخ گئج اولور - یالنیز ییخیلما واختی چاتان‌دا فاکتلاری گؤرمه‌یه و درک ائتمه‌یه باشلاییر.

سوریادا تؤره‌دیلن جینایتلره و گناه‌سیز انسانلارین اؤلدورولمه‌سینه گؤره مسئولیت اسد عائله‌سینین اوزرینده اولسا دا، اوزوقارالیق ایران لیدرلرینه قالدی.

اسلام رسپوبلیکاسی ۱۴ ایل عرضین‌ده ایران خالقینین پولونو اسدین حاکمیتینی ساخلاماق اوچون خرجله‌ییب. ایران‌لیلارین ایتیردیی تکجه میلیاردلارلا دلار وسایت دئییل، هم ده یاخین شرق تاریخین‌ده اوزرله‌رینده داشیاجاق قارا بیر لکه‌دیر.

گله‌جک نسیللر اسد عائله‌سینین جینایتلریندن دانیشارکه‌ن ایرانین و ایران‌لیلارین بو جنایتلرده شریک اولدوغونو دئیه‌جکلر.

ایران خالقی سوریا خالقینین قانینین آخیدیلماسیندا لیدرلری قدر گناهکاردیر. ۱۴ ایل «مقدس حرم‌لرین»ین مدافعه‌سی شعارینا اینانیردیلار، ایندی ایسه رژیمین «سوریا خالقی اؤز مقدراتینی اؤزو تعیین ائتمه‌لیدیر» یالانلارینا ایناناجاقلار.

سوروشان یوخدور کی، اگر سوریانین تالعینی سوریالیلار اؤزلری معینلشدیره‌جکدیلرسه، نیه ایرانین ثروتینی اسد کیمی دیکتاتورون قوجاغینا تؤکوردونوز؟ سوریا خالقینین آرزولارینین ویرانه‌سی اوزرینده ظلم سارایینی تیکنده نیه «مقدراتینی تعین‌ائتمه» یادینیزا دوشموردو؟

نیه گؤره‌سن ایران‌لیلار اؤز حاکملریندن ۱۴ ایل سوریا خالقینین قانینی تؤکمه‌سینین سببینی سوروشمور؟ قونشوسو اولمایان بیر اؤلکه‌یه نیه مداخله ائتدیینی سورغولایان یوخدور.

ایندی کیم‌سه یئنه ده سوروشمور کی، اگر سیزین ان حاقلی سببینیز «ایشید-له مباریزه» ایدیسه، ائله بیر ایش گؤردونوز کی، ایشید-ین کئچمیش عضولری ایندی بوتون سوریایا حکمران‌لیق ائدیر و خالق اونلارا دعاچی‌دیر!

ایران خالقینین اؤز لیدرلرین‌دن سوروشا بیلمدیی بیر چوخ سوال وار. بلکه ده هئچ واخت سوروشماغی باجارمایاجاقلار. ایران‌لیلارین سیاسی شعورو هله ملت سوییه‌سینه یوکسلمه‌ییب. ایران خالقینین دوشونجه طرزی و دونیاگؤروشو هله ده قبیله و طایفه تفکرو سوییه‌سینده‌دیر.

عراق خالقی - افغانیستان و اکثر عرب و اسلام اؤلکه‌لری کیمی، زمانین اویونلاریندان و باشلارینا گله‌جکلردن خبرسیز یاشایان اینسانلار توپلوسودور. بو سبب‌دن هر هانسی بیر دیکتاتور طرفیندن راحتلیقلا اداره اولونورلار. و بون‌دان دا ممنون‌دورلار. ناراضیلار ایسه آزلیق‌دا اولدوغوندان حاکیمیتین ظلمون‌دن محو اولوب گئدیر.