ترامپ آدمینیستراسییاسی گلن آی عرضینده ایرانلا باغلی قرارلار قبول ائتمه‌لیدیر. بونو ترامپین ملی تهلوکه‌سیزلیک مشاویری مایک اولتس دئییب. ایران ایسه اؤز نوبه‌سین‌ده بو بیاناتلار فونوندا گنیش مقیاس‌لی حربی تعلیملره باشلاییب.

بو حادثه‌لرله باغلی روسییالی پولیتولوگ یئوگئنی میخایلوو Axar.az-آ مصاحیبه وئریب:

- بو، اسرائیلله مناسبتلرده آرتان گرگینلیکله باغلیدیر، یوخسا ترامپین آمریکا پرزیدنتلیینه قاییتماسی؟

- اسرائیل آرتیق بیان ائدیب کی، غزه‌ده آتشکس موقتی‌دیر و او، مباریزه‌نی داوام ائتدیره‌جک و آمریکانین دستییندن یارارلاناجاق. طبیعی کی، اسرائیلین بؤلگه‌ده‌کی اساس دوشمه‌نی ایران‌دیر. مسئله اوندادیر کی، واشینگتن ایندی وضعیتی گرگینلشدیره‌جک، یاخین شرق‌ده بؤیوک محاربه یاراداجاق و اسرائیله ایرانا هجوم ائتمک حقوقو وئره‌جکمی؟ بونون فونوندا ایران طبیعی کی، حاضرلاشیر. عینی زمان‌دا، بیز بیلیریک کی، ایران، اسرائیل و آمریکالیلار چوخ واخت اؤز نیتلرینی اورتایا قویور، لاکین بونونلا باغلی هئچ نه ائتمیر.

- ترامپین دنیاداکی بوتون محاربه‌لره سون قویماق ایستیینی نظره آلساق، آمریکا ایرانا قارشی حربی آددیم آتا بیلرمی؟

- ترامپین دنیاداکی بوتون محاربه‌لره سون قویماق ایستیی باشقا جور دیرلندیریلمه‌لیدیر. آمریکا پرزیدنتینین آچیقلاما وئرمه‌سی بیر شئی‌دیر، نه ائدجیی ایسه باشقا؛ شعارلار بیر شئی‌دیر، لاکین متفیقلری، یعنی اسرائیلی قوروماق و یاخین شرقده اسرائیلی گوجلندیرمک تمام باشقا شئی. یئنه ده یاخین شرقده، کونکرت اولاراق ایرانلا باغلی فاکتیکی حربی عملیاتلار باش وئررسه، وضعیت بوتون عرب دنیاسینین آیاغا قالخا بیلجیی بیر نقطه‌یه گله بیلر. آمریکا ایسه بونو چوخ گؤزل باشا دوشور و اونا گؤره ده اونلارین یاخین شرق‌ده بو قدر ثابت‌لییی پوزاجاقلاری احتمالی آزدیر. ایران آمریکانی قانع ائده، آمریکا ایسه ایرانا مناسبت‌ده اسرائیلی دایاندیرا بیلر. ایران ایندی معین امکانلارینی ایتیریب و بوتون جبهه‌لرده دؤیوشمه‌یه حاضر دئییل. ایرانلا دانیشیقلار آپارماق، اونا تضییق ائتمک اولار. اونا گؤره ده حساب ائدیره‌م کی، هله‌لیک ایرانلا باغلی گئنیش مقیاس‌لی حربی عملیاتلار اولمایاجاق.

- حزبوللاهین ضعیف‌لدیلدیینی و ایرانین سوریاداکی اساس طرفداشی بشار اسدین دئوریلدیینی نظره آلساق، محاربه باشلاسا، تهران حاکمیتی نئجه داوراناجاق و کیمه آرخالاناجاق؟

- محاربه‌یه احتمال وئرمیرم، اما هر حال‌دا ایرانین متفیقی وار - روسیا. طبیعی کی، ایران اوچون حربی عملیاتا گیرمه‌یه‌جییک، اما دوشونوره‌م کی، هرطرف‌لی دستک وئرجه‌ییک. ایسته‌نیله‌ن حال‌دا روسیا اسرائیل، آمریکا و ایران آراسیندا بیر نوع دانیشیق آپاران رولوندا چیخیش ائده بیلر. چونکی یئنه ده، نه اولورسا اولسون، اسرائیلله و آمریکانین یئنی آدمینیستراسیاسی ایله دانیشماق امکانلاریمیز وار. دئمه‌لی، ایران کونجه سیخیشدیریلسا، محاربه بوتون یاخین شرقی بورویه‌جک. بو، هئچ کسین ماراغیندا دئییل. ایران معین قوه‌لرین اونون دولت‌چیلیینی تهدید ائتدیینی آنلایاراق بوتون رگیونو یاندیرماق امکانینا مالیکدیر. و کونجه سیخیشدیریلاندا دولت چوخ سرت مباریزه آپاریر. خصوصاً ده معاصر سلاحلارین بیر چوخ نوع‌لری، معین امکانلاری، طرفداشلاری اولان ایران سونا قدر مباریزه آپاراجاق. داها آز محاربه‌یه و آمریکانین داها چوخ اداره اولونماسینا، تعریفله‌نمه‌سینه احتیاج اولدوغونو دئیه‌ن همین ترامپین بئله وضعیته احتیاجی یوخدور.