روسییا هله ده اوکراینا مسئله‌سینی حل ائده بیلمیر و حاضردا آمریکادان آسیلیدیر. بونا باخمایاراق، روسییا ایرانا تکلیف ائدیر کی، نووه مسئله‌سینده آمریکا ایله دانیشیقلارا کمک ائده بیلر. منجه، روسییادان کمک گؤزله‌مک عبثدیر. آیدین مسئله‌دیر کی، روسلار هر زامان ایران‌دان کارت کیمی استفاده ائدیبلر و تهرانین ماراقلارینین علیهینه چیخیبلار. ایران بو اؤلکه‌نی اؤزونه واسطه‌چی کیمی سئچسه، بو، باشلی-باشینا بیر مغلوبیت اولار. روسییا کئچمیشده ده گؤستریب کی، او یالنیز یاخشی آلوئرچیدیر و ایران اوزریندن آلوئر ائدیر. هر دفعه سؤزده تهرانلا امکداشلیغی وورغولاسا دا، آرخا فوندا واشنگتن‌لا اورتاق ماراقلارا خدمت ائدیر. خوشبخت‌لیکدن، حاضیرکی سیتواسییادا روسییانین موقعیی اوولکی قدر گوجلو دئییل. روسییا آرتیق اوولکی روسییا دئییل و اونون ضعیفله‌مه‌سی عمومیتله بوتون خالقلارین خیرینه‌دیر.

بو سؤزلری Axar.az آچیقلاماسیندا ایرانین آذربایجانداکی کئچمیش سفیری افشار سلیمانی روسییانین نووه دانیشیقلاری مسئله‌سینده آمریکا و ایران آراسیندا واسطه‌چی‌لیک ائده بیله‌جه‌یی حاقدا اینفورماسییالاری شرح ائدرکن دئییب.

«اگر اوکراینا مسئله‌سینده موسکوا و واشنگتن اورتاق مخرجه گلرسه، روسلار ایرانی خرجله‌یه‌جک. هر حال‌دا، ایران آمریکا و روسییا آراسیندا دانیشیقلار مسئله‌سینده خییر قازانان طرف اولمایاجاق. بونا باخمایاراق، حاضردا ایران اوچون فرصت یارانیب، چونکی اوکراینا مسئله‌سی اؤن پلاندادیر. بونا گؤره ده ترامپ «بو محاربه‌نی بیتیره‌ن من اولدوم» دئمک اوچون ایلک نوبه‌ده بو مسئله‌نی بیر آن اول حل ائتمک ایسته‌یه‌جک. ایران مسئله‌سی ایسه هله‌لیک ایکینجی پلاندادیر. دیگر طرفدن بو، هم ده کریتیک بیر وضعیت‌دیر»، - سلیمانی بیلدیریب.

اونون سؤزلرینه گؤره، تخمیناً نوبتی ۳-۴ آی عرضینده ماگاته-ده کئچیریله‌جک اجلاسدا ایرانلا باغلی مسئله کونکرتلشه‌جک:

«اگر ایرانلا ماگاته مسئله‌لرینی حل ائده بیلمه‌سه‌لر، آرتیق حاکملر شوراسی ایرانین علیهینه جدی بیر قطعنامه وئره بیلر. ۲۰۲۵-جی ایلین اوکتیابر آییندا تهلوکه‌سیزلیک شوراسی‌نین ۲۲۳۱ نؤمره‌لی قطعنامه‌سی‌نین واختی بیته‌جک و قرار وئریلمه‌دن اول ایران بو قوروملا راضیلیغا گلمه‌لی‌دیر. عکس تقدیرده، آوروپا اؤلکه‌لریندن بیری - انگیلتره، آلمانییا و یا فرانسا سانکسییالاری آوتوماتیک اولاراق برپا ائده بیلر. همچینین بو سازیشده ب‌ام‌ت-نین ۷-جی فصلینده‌کی «دنیادا صلحون و تهلوکه‌سیزلیین قورونماسی» مسئله‌سی و بونا قارشی اولان اؤلکه‌لره محاربه ایله جواب وئرمک حقوقو و س. کیمی مسئله‌لر ده قالدیرلا بیلر.

ایران آمریکا ایله دانیشماسا بئله، ان آزیندان ماگاته ایله مسئله‌لری حل ائتمه‌لیدیر کی، مثبت بیر راپورت وئریلسین و وضعیت نسبتا یومشالسین. دوزدور، البته، ایرانلا غربین و خصوصاً ده آمریکانین آراسیندا حل اولونمایان دیگر مسئله‌لر ده وار، مثلاً، رئگیون و راکتلر مسئله‌سی و س. اما منجه، ایران رئگیون مسئله‌سینده آرتیق گئجیکیب و الینده‌کی کارتلاری ایتیریب. حاضردا ایرانین الینده‌کی تک کارت اورانی زنگینلشدیرمک و آتم سلاحی الده ائتمکدیر، لاکین بو بئله ایرانین پروبلئمینی حل ائتمه‌یه‌جک».