۱۱:۳۷

آذربایجان رسپوبلیکاسینین پرزیدنتی ایلهام علیئو مارتین ۲۹-دا شفیقه مممدووانی قبول ائدیب و اونا «استقلال» اوردنینی تقدیم ائدیب.

Axar.az خبر وئریر کی، شفیقه مممدووانی سلاملایان پرزیدنت ایلهام علیئو دئدی:

- حرمت‌لی شفیقه خانیم، سیزی قارشی‌دان گلن یوبیلیینیز مناسیبتیله اورکدن تبریک ائدیره‌م، سیزه جانساغلیغی، یئنی اوغورلار آرزولاییرام. سیز اوزون ایللر عرضین‌ده آذربایجان مدنیتینین انکشافین‌دا چوخ اؤنملی رول اویناییرسینیز، اؤلکه‌میزین تئاتر و کینو صنعتینه دیرلی تهفه‌لر وئرمیسینیز. هم گؤزل آکتریسا، هم پئداگوگ، اجتماعی خادم کیمی خالقیمیزین حرمت و رغبتینی قازانمیسینیز. اولو اؤندر حیدر علیئو سیزین فعالیتینیزی همیشه یوکسک قیمتلندیریردی، سیز بونو یاخشی بیلیرسینیز. هله سووت دورون‌ده سیز هم آذربایجان رسپوبلیکاسینین، هم سووئت اتفاقینین دولت مکافاتلارینا لایق گؤرولموسونوز. مستقل‌لیک ایللرینده، ۲۰۰۰-جی ایلده اولو اؤندرین سرانجامی ایله سیز «شهرت» اوردنی ایله تلطیف اولونموسونوز. اوندان سونرا دا آذربایجان دولتی سیزین فعالیتینیزی همیشه یوکسک قیمتلندیره‌رک سیزی عالی مکافاتلارلا تلطیف ائتمیش‌دیر. منیم سرانجامیملا سیز "شرف"، بیرینجی درجه‌لی "امک" اوردنلری، فخری دیپلم ایله تلطیف اولونموسونوز. بو گون امضالادیغیم سرانجام اساسین‌دا «استقلال» اوردنی ایله تلطیف ائدیلیرسینیز. اجازه وئرین، بو یوکسک، عالی مکافاتی سیزه تقدیم ائدیم.

پرزیدنت ایلهام علیئو «استقلال» اوردئنینی شفیقه مممدووایا تقدیم ائتدی.

پرزیدنت ایلهام علیئو: تبریک ائدیره‌م.

شفیقه مممدووا: چوخ ساغ اولون، میننتدارام، جناب پرزیدنت.

من بو گون سحردن طبیعی کی، هیجان ایچینده‌یه‌م. محترم جناب پرزیدنت، بو گون منیم حیاتیمین ان خوشبخت، ان معنالی و نتیجه‌لی گونلریندن بیریدیر. حرمت‌لی جناب پرزیدنت، بو گون سیز منه ائله بیر زیروه‌نی، ائله بیر غرورو بخش ائتمیسینیز کی، من عمرومون آخیرینا کیمی سیزه میننتدار اولاجاغام. قوی اولو تانری سیزی حفظ ائلسین، دولتیمیز اوچون، خالقیمیز اوچون، عائله‌نیز اوچون و بیزیم اوچون قوروسون. الله سیزه او قدر گوج-قوه وئرسین کی، سیز بو بؤیوک سیاست‌ده داها دا یوکسک زیروه‌لری فتح ائدسینیز.

پرزیدنت ایلهام الیئو: ساغ اولون، تشکر ائدیره‌م. چوخ ساغ اولون.

شفیقه مممدووا: وار اولون. خواهیش ائدیره‌م، سیزه و گؤزل مهریبان خانیما اولان درین احتیرامی‌می، حرمتی‌می، محبتی‌می قبول ائدسینیز.

پرزیدنت ایلهام علیئو: مهربان دا سیزه سلاملارینی چاتدیریر، اؤزو ده تبریک ائد‌جک.

شفیقه مممدووا: چوخ ساغ اولسون، وار اولسون. وار اولون جناب پرزیدنت، آدینیز همیشه ایشیقلانسین.

پرزیدنت ایلهام علیئو: ساغ اولون، تشکر ائدیره‌م.

شفیقه مممدووا: میننتدارام، چوخ ساغ اولون.