اسرائیل اؤتن گونلرده سوریادا یئرلشن ت۴ حربی هوا بازاسینا هجوم ائد‌رک جدی داغینتیلارا سبب اولوب. عینی زمان‌دا، تورکیه‌نین سوریادا حربی بازا قورماغا حاضرلاشدیغینا دایر خبرلرین یاییلدیغی بیر واختدا اسرائیلین بو هجومو بؤلگه‌ده گرگین‌لییی داها دا آرتیریب.

Axar.az خبر وئریر کی، تورکیه‌لی تهلوکه‌سیزلیک اکسپرتی ائرای گوجلور مسئله ایله باغلی آچیقلاماسین‌دا اسرائیلین سوریانی اشغال ائتمک گوجونده اولمادیغینی بیلدیریب.
«حاضردا تورکیه ایله اسرائیل آراسیندا بیرباشا سلاحلی قارشی‌دورما احتمالی اولدوقجا آشاغیدیر. یالنیز تصادفی بیر حادثه، یا دا سهو نتیجه‌سینده بئله بیر وضعیت یارانا بیلر، اما بو دا چوخ ضعیف احتمال‌دیر. چونکی اسرائیلین تورکیه ایله حربی باخیمدان رقابت آپارماق اوچون کفایت قدر گوجو یوخدور»، - گوجلور وورغولاییب.

اکسپرت قید ائدیب کی، تورکیه‌نین سوریادا اسرائیله قارشی استراتژی بالانس یاراتماق اوچون استفاده ائده بیله‌جیی چوخلو واسطه موجوددور. حاضردا آنکارا اسرائیلین آقرسیو داورانیشلارینی اؤنله‌مک اوچون سیاسی زمین فورمالاشدیریر و بو پروسسی آمریکا ایله بیرلیکده آپاریر:

«آرتیق آمریکا دا اسرائیلین بوتون طلبلرینی اولکی کیمی قبول ائتمیر. چونکی بؤیوک استراتژی پلاندا سوریا اساس هدف دئییل – اساس دقت داها شرق‌ده‌کی مسئله‌لره، او جمله‌دن اورتا شرقه و ایرانا یؤنلیب».

اکسپرتین فکرینجه، آمریکانین بو استراتگییاسی چرچیوه‌سینده تورکیه ده سیاسی زمین یاراداراق سوریاداکی وضعیتین بو اؤلکه‌نین اؤز گوجو ایله حل اولونماسینا چالیشیر:

«بونلار آسان ایشلر دئییل، اما تکنیکی باخیم‌دان اسرائیلین تورکیه‌نی و اونون بؤلگه‌ده‌کی وارلیغینی تاثیرسیز حالا گتیرمه‌سی چوخ چتین مسئله‌دیر. حاضردا سوریادا اؤرتولو بیر محاربه گئدیر. سوریا ایله اسرائیل سرحدی آراسیندا اسرائیلین دوروزیلری قالدیرماغا جهد ائتمه‌سی، درادا یئرلی اهالینین بونا رئاکسیا وئرمه‌سی و طرطوس–لازکیه خطین‌ده باش وئره‌ن عصیان جهدی بونون بارز نمونه‌لریدیر. همچینین فراتین شرقین‌ده‌کی پ.کا.کا وارلیغینا قارشی تورکیه‌نین تضییقلری ده داوام ائدیر. تورک کشفیاتی و ملی گوج ایستروکتورلاری بؤلگه‌ده آکتیو فعالیت گؤستریر».