ایراندا هر هانسی بیر فلاکت( سیز دئیین جنایت) باش‌وئرن کیمی «روشن‌فکر»-لریمیز تسلیت دئمه‌یه باشلاییر و بونونلا دا صحبت باغلانیر!

بندرعباسین شهید رجایی لیمانیندا باش وئرمیش دهشتلی پارتلاییشین مسئولیتی بیرباشا ایران اسلام رسپوبلیکاسینین اوزرینده‌دیر. آرتیق اوزون ایللردیر کی، ایران خالقی بونا بنزر حادثه‌لرین تئز-تئز شاهدی اولور و بوتون بونلارین آرخاسیندا رژیمین باجاریقسیزلیغی، انسان حیاتینا دییر وئرمه‌مه‌سی، کفایت‌سیزلییی دورور و بو کفایت‌سیزلیین بدلینی بیزیم خالق اوز جانی و مالی ایله اوده‌ییر.

لاکین، هر زامان کیملرسه چیخیر و بو مسئولیتی رژیمین اوزریندن آتماغا چالیشیر. آردی کسیلمه‌ین بئله بیر جنایتلره تسلیت دئمکله یئتینمک، یالنیز مولا حکومتینین ماراقلارینا خدمت ائدیر. باشساغلیغی بیزیم هئچ بیر دردیمیزه دوا اولمایاجاق؛ بیزه گرکن مسئول شخصلرین قانون قارشی‌سیندا جواب وئرمه‌سی و بو کیمی حادثه‌لرین قارشیسی آلینماسیدیر.

بئله بیر حادثه‌لردن سونرا روشنفکرلرین تسلیت دالغاسینا قاتیلماسی ماراقلی‌دیر. کیمه و نه‌یه گوره باشساغلیغی وئریرسینیز؟ بو گونکو گونده بو، انسانلارین دقتینی مسئله‌نین اصلیندن یایندیرماقدان باشقا نه‌دیر؟ بونون آدی؛ «جنایته گوز یومماق»-دیر.

خالقا بوش-بوش تسلیتلر گرک دئییل. اونلار اوچون بئله بیر حادثه‌نین تکرار اولونماماسی اونملی‌دیر و بورادا سیزلره، بیزلری، آغزی سوز و الی قلم توتان هر کسه واجب‌دیر کی فکرلری دوغرو استقامته یونلتسین.