«بی بی سی فارسجا» سایتی تبریزین "تراکتور" کومانداسینین آزارکشلرینین شعارینی تحریف ائدیب.

آخار. آذ خبر وئریر کی، «تراکتور» طرفدارلاری «سپیدرود»لا اویونون ۲۵-جی دقیقه‌سین‌ده «سهند میدانین‌دا – تورک قیزلارینین یئری بوش» شعارینی سسلندیره‌رک ایران‌دا قادینلارین ایستادیونا بوراخیلماماسینا اعتراض بیلدیریبلر.

آزارکئشلر اویون زامانی "آذربایجان قیزلاری، گؤیلرین اولدوزلاری - ایستادیون یوللاری، گؤزلییر اونلاری"، "آشیقانه، بیز بو وطن آشیقی – آرخانیزداییق، بیز آلاریق حاقینیزی، تورک قیزلاری، تورک قیزلاری، تورک قیزلاری...» ماهنی‌سینی اوخویوبلار.

بعضی ایران سایتلاری و "بی بی سی فارسجا" ایسه اویونلا باغلی یایدیقلاری خبرلرده «تورک» سؤزونو چیخاریبلار. بو تحریف آذربایجانلی اینترنت ایستیفاده‌چیلرینین کسکین اعتراضی ایله قارشیلانیب، سویداشلاریمیز "بی بی سی فارسجا" خیدمتینین اینترنت صحیفه‌لرینده اؤز اعتراضلارینی بیلدیرمه‌یه داوام ائدیرلر.