آذربایجان پاراتکواندوچوسو امام‌الدین خلیلوو (ک-۴۴) دنیا چمپیونو تیتولونا صاحب اولوب. ۷۰ کیلوگرم چکی‌ده قوه‌سینی سینایان ایدمانچی بو اوغورا مکسیکانین وراکروز اشتاتیندا کئچیریله‌ن موندیالدا امضا آتیب.

بو باره‌ده Axar.az-آ تکواندو فدراسیاسیندان معلومات وئریلیب.

قید اولونوب کی، ۱/۱۶ فینالدان آزاد اولان خلیلوو ایلک دؤیوشونده اسپانیالی پاراتکواندوچو ایله اوز-اوزه گلیب. هم‌یئرلیمیز دنیا و آوروپا چمپیونونو ۷:۳ حسابی ایله مغلوب ائدیب. او، آردینجا گورجوستانلی ایدمانچینی مبارزه‌دن کنارلاشدیریب – ۱۶:۲. امام‌الدین یاریمفینالدا کوبا تمثیلچی‌سی ایله دؤیوشوب. گرگین کئچه‌ن گؤروشده ییغما عضوو ۱۲:۹ حسابی ایله غلبه قازانیب.

پاراتکواندوچوموزون فینالدا رقیبی اؤزبکیستانلی اولوب. خلیلوو بو دفعه ۵:۲ حسابی ایله غالیب گله‌رک، دنیا چمپیونو آدینا ییلنیب و مکسیکادا آذربایجان هیمنینی سسلندیریب. بونونلا دا امام‌الدین اشتراک ائتدیی ۶ یاریشدا ۶-جی مکافاتینی قازانیب. نیدرلانددا آوروپا پارالیمپییا اویونلاریندا، جنوبی کوریادا آچیق دنیا چاغیریش یاریشیندا، مکسیکادا گران-پریده بیرینجی یئری توتان پاراتکواندوچو فرانسادا آچیق آوروپا چمپیوناتیندا ایکینجی، پاریسده گران-پریده اوچونجو اولوب.

دنیا چمپیوناتینداکی اوغور پاراتکواندونون یای اولیمپییا اویونلارینا داخل ائدیلمه‌سیندن سونرا ایلک قیزیل مدال کیمی تاریخه دوشوب.

قید ائدک کی، سنتیابرین ۲۴-ده یکونلاشاجاق. موندیالین سون گونونده ابوالفض آبوزرلی (۸۰ کیلوگرم، ک-۴۴) مبارزه‌یه قوشولاجاق.