عراق مرکزی بانکی ایران میللی بانکینین بو اؤلکه‌نین شهرلرین‌ده‌کی فیلیاللارینین فعالیتینی محدودلاشدیریب.

ایران میللی بانکینین خاریجی والیوتالار و بین الخالق مسئله‌لر اوزره دیرکتور معاوینی محسن امین زارعیین سؤزلرینه گؤره، ایران رسمیلرینین سون آیلاردا بو محدودیتی آرادان قالدیرماق اوچون سعیلری نتیجه‌سیز قالیب.

ایران میللی بانکینین رسمیلری محدودیتلرین آمریکانین طلبی ایله تطبیق ائدیلدیینی سؤیلییر. عراق رسمیلری آمریکانین سانکسییالارینا پرینسیپجه قارشی چیخماسینا باخمایاراق دایم بیلدیریبلر کی، اؤلکه‌سینین ماراقلارینی قوروماق اوچون همین سانکسییالارا عمل ائتمک مجبوریتینده‌دیر.

ایران میللی بانکینین عراق‌داکی فیلیاللارینین فعالیتینین محدودلاشدیریلماسی اؤتن ایلین یایین‌دان باشلاییب و عراق رسمیلرینین تاکیدی ایله ایندیدک داوام ائدیب.

اوکتیابرین ۲-ده مشهد شهر فیردوسی اونیورسیتتینده کئچیریلن اقتصادی کنفرانس‌دا چیخیشین‌دا دئییب کی، بو بانکین «عراق‌دا نجف، بغداد و بصره شهرلرین‌ده اوچ فیلیالی وار» کی، اونون سؤزلرینه گؤره، «حاضردا عراق مرکزی بانکی آمریکالیلارین تضییقی ایله همین فیلیاللارین فعالیتینی محدودلاشدیریب».

اونون سؤزلرینه گؤره، عراق مرکزی بانکی «میللی بانکین هر بیر فیلیالینا بیر شخص یئرلشدیریب و ایشلریمیزین بیر چوخونو دایاندیریب».

ایران میللی بانکینین خاریجی والیوتا و بین الخالق مسئله‌لر اوزره دیرکتور معاوینی وورغولاییب کی، «سون بئش-آلتی آی عرضین‌ده بو پروبلمی حل ائتمه‌یه چالیشدیق، آنجاق نتیجه الده ائده بیلمدیک».