بو گون خالق آرتیستی، کینورژیسور، سسناریست، آکتیور و اوپراتور مختار داداشووون آنادان اولماسینین ۱۱۲-جی ایلدؤنومو تامام اولور.

Kult.az خبر وئریر کی، او، ۱۹۱۳-جو ایل سنتیابرین ۱۱-ده باکی‌دا دنیایا گؤز آچیب. هله ائرکن یاشلاریندان طالع اونون یولونو بؤیوک صنعت معبدین‌دن سالیر. بئله کی، آکادئمیک میللی درام تئاترینین صحنه‌سین‌ده گؤرکملی دراماتورگ جعفر جاببارلینین «سئویل» تاماشاسین‌دا گوندوز رولونو اویناییر. بو، اونون حیاتین‌دا یئنی صحیفه‌لر آچیر. قلبینده گؤرکملی صنعت اوستالاری ایله بیر یئرده چالیشماق آرزولاری باش قالدیریر. ۱۹۲۹-جو ایلده گنج تاماشاچیلار تئاترین‌دا رژیسسور آسسیستنتی کیمی فعالیته باشلاییر. عینی زامان‌دا، تاماشالاردا کیچیک روللار اویناییر. ۱۹۳۱-جی ایلده کینوستودییادا اوپراتور آسسیستنتی وظیفه‌سین‌ده چالیشیر. بیر سیرا سندلی و بدیعی فیلملرین لنته آلینماسین‌دا اشتراک ائدیر. ۱۹۳۳-جو ایلده اوپئراتور تحصیلی آلماق مقصدیله موسکوایا گئدیر. اورادا دا بیر سیرا فیلملرین چکیلیشین‌ده اشیراک ائدیر. تحصیلینی باشا ووردوقدان سونرا بؤیوک امیدلرله وطنه دؤنور، کینواستودییادا اوپراتور ایشینه قاییدیر. ۱۹۳۵-جی ایلده «رقص ائد‌ن باغالار» بدیعی فیلمینین (عبدالله شائقین «اویون‌چو باغا» حکایه‌سی اساسیندا) قورولوشچو اوپراتورو اولور.

دؤورون مهم اجتماعی-سیاسی حادثه‌لری اونون لنته آلدیغی سندلی فیلملرین اساس موضوعسونو تشکیل ائدیب. «آنا یوردوم، آذربایجان»، «آرازین او تاییندا»، «صابر»، «کور»، «سعادت یولو ایله» و س. فیلملرین‌ده وطنین اسرارنگیز طبیعتی، تاریخی شخصیتلری کینو دیلی ایله ترنم اولونوب.

او، کینو حاقیندا دانیشاندا دئیردی: «کینو حیاتین آیناسی‌دیر. صابر دئمیشکن، «دوزو-دوز، ایرینی-ایری» عکس ائتدیرمه‌یه قادیر اولان معجزه‌دیر. او، معنن صاف، جانینی صنعته فدا ائد‌ن استعدادلی و پروفسیونال شخصلرین الینده اولمالی‌دیر». دوغرودان دا، مختار داداشوو کینویا قلبا باغلی اولوب. ائکران اثرلرینده فردی‌لیک قاباریق شکیل‌ده گؤرسنیب.

مختار داداشوو ۱۹۴۵-جی ایلده چکیلن «آرشین مال آلان» فیلمینده اوپراتور کمکچیسی اولوب. خالق آرتیستی لیلا بدیربیلی بو فیلمین چکیلیشلریندن سؤز دوشه‌ن‌ده مختار داداشووو آکتیورون داخیلی عالمینه نفوذ ائتمه‌یی باجاران صنعتکار کیمی کاراکتریزه ائتمیشدی. «کندلیلر»، «یئنی هوریزونت»، «وطن اوغلو»، «سوآلتی قاییق ت-۹» بدیعی فیلملری ده اونون اوپراتور کامئراسی واسطه‌سیله حیاتا وسیقه آلیب.

قورولوشچو رژیسسور کیمی ایسه دئبوتو «قانون نامینه» بدیعی فیلمی اولوب. خالق یازیچیسی سلیمان رحیم‌آوون «مهمان» پووستی اساسین‌دا چکدیی فیلمین سسناریسینی ده اؤزو یازیب. فیلم‌ده باش رولا کناردان آکتیور (شمالی اوستییادان بیمبولات واتایئو) دعوت اولونسا دا، ائکران اثرینده بیر چوخ گؤرکملی صنعتکارلاریمیز دا رول آلیب: عادل اسگندراو، رضا طهماسب، مصطفی مردان‌او، نجیبه ملیکووا، نصیبه زینالووا، حاجیبابا باغیراو...

مختار داداشووون «باکی‌دا کولکلر اسیر» فیلمی محاربه موضوعسون‌دا چکیلن دیرلی ائکران اثرلریندن‌دیر.

او، هم ده آراشدیریجی رژیسسور اولوب. چکدیی تاریخی فیلملر اوچون زنگین ماتریال توپلایار، سونرا اونلاری لئنته آلاردی. «نریمان نریمان‌او» سندلی فیلمینین (۱۹۶۶) چکیلیشی زامانی دا بئله اولوب. ن.نریمان‌اون گئنویا کنفرانسینداکی چیخیشینی عکس ائتدیره‌ن کادرلاری موسکوا آرخیولرینین بیریندن تاپیب، سونرا همین کادرلاری فیلم‌ده جانلاندیریب.

صنعتکارین گرگین و یارادیجی امه‌یی دولتیمیز طرفیندن یوکسک قیمتلندیریلیب. او، امکدار اینجه‌صنعت خادیمی، خالق آرتیستی فخری آدلارینا و «شهرت» اوردئنینه لاییق گؤرولوب. دولت مکافاتی لاورئاتی اولوب.

۱۹۹۸-جی ایل مایین ۷-ده وفات ائد‌ن صنعتکار بو گون ده حرمت و محبتله یاد ائدیلیر.