گونئی آذربایجان‌لی شاعر و اجتماعی خادیم حمیده ریس‌زاده (سحر) ایسوچین مالمؤ شهرینده ۷۴ یاشین‌دا دنیاسینی دییشیب.

Kult.az خبر وئریر کی، بو باره‌ده اونون عائله‌سی معلومات یاییب.

سحر ۱۹۵۲-جی ایلده اردبیل شهرین‌ده آنادان اولوب، ابتدای تحصیلینی آلدیق‌دان سونرا تهرانا کؤچوب و اورادا یارادیجی‌لیق و اجتماعی فعالیتله مشغول اولوب.

۱۹۷۹-جو ایل انقلابین‌دان سونرا تضییقلر نتیجه‌سینده سیاسی فعالیت‌دن چوخ ادبی یارادیجی‌لیق و اجتماعی فعالیته اوستونلوک وئریب.

قادین حقوقلارینین پوزولماسینا قارشی تنقی‌دی چیخیشلاری و فعالیتینه گؤره اوزلشدیی تضییقلر سببین‌دن ایسوئچه موهاجیرت ائتمک مجبوریتین‌ده قالیب.

سحرین یارادیجیلیغینین اساس حصه‌سی آذربایجان دیلین‌ده اولوب و اؤزونه مخصوص اوسلوبو ایله سئچیلیب، خصوصاً یئنی نسیل یازی‌چی، شاعر و ادبیاتسئورلر آراسین‌دا سئویلیب.

اونون "ماویلر" شعیرلر کیتابی گونئی آذربایجان و عمومیتله ایران‌داکی آذربایجان‌لی ادبیات‌چیلار و ادبیات سئورلر آراسین‌دا هم اصلوب و هم ده دوشونجه‌نین ایفاده‌سی فورماسینا گؤره یئنی ادبی جریانین یارانماسینا سبب اولوب.

شاعرین "یاشیل ماهنی"، "آیلی گونش" و "بیر دسته باخیش" شعیر کیتابلاری آذربایجان دیلینده ان چوخ ساتیلان کیبالار آراسیندا ایلک یئرلری توتوب.

یاشیل احساسلی

یئنه نیسگیل له‌چه‌یین سالدی خزان،

آچمامیش غنچه‌لری چالدی خزان،

منی ده جایناغینا آلدی خزان،

یاشیل احساسلی چمن ساخلا منه.

یالانا دوزلوک اوخو ائتسه اثر،

گول بیتیب، غنچه گولوب، آچسا سحر،

بیرده گؤرکملی اورک گؤرسن اگر،

او اورکلرده وطن ساخلا منه.

سؤزلرین سینه‌لره کؤز قالادار،

دویغومو توشگولو کؤزدن جالادار،

اونداکی سؤز گونشی چالخالادار،

سؤزده اولدوز کیمی دن ساخلا منه.

دایاق عنوانلی داغ آواره‌سی‌یم،

قارا گونلرده آغ آواره‌سی‌یم،

بیر گولوشلوک دوداق آواره‌سیییم،

غملره قارشی گولن ساخلا منه.

دمیرم، خوشلوغا یاد ائت، یادا سال،

غم اؤنونده آدیمی فریادا سال،

منی ده غم بؤلوشنده آدا سال،

بیر اورک پایلی محن ساخلا منه.

بیر دایان، زیروه‌یه دیز قوی، گلیرم،

سانما کی، خسته‌یم، ایز قوی، گلیرم،

بیر چاناق سؤزده دنیز قوی گلیرم،

بیر دؤیوش میدانی چن ساخلا منه.

اوجالیقلاردا ایزین وار دئیه‌رک،

چیخارام داغلارا "یار-یار" دئیه‌رک،

گلره‌م غربت ائوین دار دئیه‌رک،

وطن عنوانلی کفن ساخلا منه.