آمریکا دولت کاتبی مارکو روبیونون ارمنستانا سفرینین «ایکی‌طرفلی طرفداشلیغی گوجله‌ندیرمک و بیر سیرا سازشلر امضالاماق» مقصدی داشیدیغی بیلدیریلسه ده، بونون ۷ ایوندا کئچیریله‌جک پارلامنت سئچکیلریندن اؤنجه باش وئرمه‌سی «گیزلی میسیا»یا دقت چکیر. صحبت واشینگتنون ارمنستانین باش ناظیری نیکول پاشینیانا سئچکی دستییندن گئدیر و بو پلانی «دیپلماتیک مذاکره‌لر» آدی آلتیندا گیزلتمک اوغورسوز جهددن باشقا بیر شی دئییل.

هر شی اورتادادیر: روبیونون ایروان سفری آمریکانین سئچکیده پاشینیان کومانداسینین یانیندا اولدوغونو نمایش ائتدیرمه‌یه حسابلانیب؛ بو نماییشین ارمنی سئچیجیلرین سئچیمینه نه قدر تأثیر ائدجه‌یی معمالی اولسا دا، باشدا روسیا اولماقلا پروسسه مداخله ائتمک ایسته‌یه‌ن طرفلره آچیق مساژ کاراکتری داشیدیغی بللیدیر.

اصلینده روبیونون سئچکییه ساییلی گونلر قالمیش ارمنستانا سفری ده پروسسه مداخله کیمی قیمتله‌ندیریله بیلر. روسیانی سئچکیلره مداخله‌ده اتهام ائد‌ن غرب آنالوژی سیاستی اؤزونه روا گؤرور. آوروپا بیرلیی مسکوانین سئچکییه ممکون مداخله‌سینه قارشی ارمنستانا «خصوصی میسیا» گؤندردی، داها سونرا ایرواندا کئچیریله‌ن آوروپا سیاسی بیرلیینین ساممیتینده حاکمیته دستک وئردیلر. ایندی روبیونون تیمثالیندا آمریکا نوبتی دستک آددیمی آتیر. ترامپین حاکمیته گلیشیندن سونرا واشینگتن-بروکسل خطینده مشاهده اولونان اوزاقلاشما فونوندا حساب ائتمک اولار کی، آمریکا آوروپا بیرلییندن گئری قالماق ایسته‌میر. هرچند، آمریکا و آوروپا بیرلیینین پاشینیانا سئچکی دستیینین هدفی عینیدیر: ایروان‌دا مسکوانین مؤقعلرینه ضربه وورماق، ارمنستانلا غرب آراسین‌دا یاخینلاشما کؤرپوسونو گوجله‌ندیرمک، عمومی‌لیکده روسیانین رگیوندا تأثیرینی ضعیفلتمک؛

روبیونون ارمنستاندا «گیزلی میسیاسی» باش توتاجاقمی؟

بو سوالین جوابی بیرمعنالی دئییل. چونکی اؤتن آی آمریکا ماجاریستاندا عینی تاکتیکادان استفاده ائتمیش، دولت کاتبی جیمز دی ونس سئچکیدن اؤنجه بوداپشته سفر ائد‌رک، ویکتور اوربانا دستیینی نماییش ائتدیرمیشدی. بو دستک اوربانی سئچکیده مغلوبیتدن خلاص ائتمه‌دی. ایندی ده روبیونون واسطه‌سیله ارمنستان‌دا پاشینیانا عینی دستک مخانیزمی ایشه سالینیر. اوربانی «خلاص» ائده بیلمه‌یه‌ن آمریکا پاشینیانا غلبه نصیب ائد‌جکمی؟ سوالین جوابی ۷ ایوندا بللی اولاجاق. حاضردا ترامپ آدمینیستراسییاسینین «سئچیلمیش دوستلارا» دستک مقصدیله بیرباشا مداخله تاکتیکاسیندان استفاده ائتدیی بللی‌دیر. کی، بو دا بیرمعنالی قارشیلانمایان مسئله‌دیر.

پاشینیانا دستک اوچون ارمنستانا محض روبیونون گلیشینده دولت کاتبینین ارمنی‌پرست موقعیی ده رول اویناییر. اوزون ایللر ارمنی لوبی‌سینین فعال دستکچی‌سی اولان روبیو آمریکا ارمنیلری ملی کمیته‌سینین سئویملی سیاستچیلریندندیر. اونون قوندارما «ارمنی سویقیریمی» مسئله‌سینه، او جمله‌دن، آذربایجان علیه‌اینه اولان قرارلارین قبولونا وئردیی دستک، آمریکا-دا آنتی-باکی سیاستینین فورمالاشماسیندا اوینادیغی رول آنجا طرفیندن یوکسک قیمتلندیریلیب. ۲۰۲۲-جی ایلده روبیو تورپاقلارینی آزاد ائتدیی اوچون آذربایجانا قارشی باشلالانان «کامپانیا خورونا» قوشولموشدو. حتی همین ایل او، سناتین خارجی علاقه‌لر کمیته‌سینین صدری بوب منندزله بیرلیکده آذربایجانا قارشی «حربی یاردیملارین دایاندیریلماسی، سانکسییالارین تطبیق ائدیلمه‌سینین» تکلیف اولوندوغو، ائلجه ده «محاربه جنایتلری»نه دایر قوندارما اتهاملارین یئر آلدیغی غرضلی قطعنامه ده ایر‌لی سورموشدو. روبیونون دولت کاتبی پستونا نامزدلیینین ایلک دستکچیلری آراسیندا آمریکا ارمنیلری ملی کمیته‌سینین اولماسی تصادفی دئییلدی. بو کونتکستده ارمنستانا محض روبیونون سفری اوزون ایللر عرضینده فورمالاشان ارمنی‌پرست موقعیین منتیقی داوامی کیمی گؤرونور.

بورادا اساس مقاملاردان بیری روبیونون ارمنستانا دستک سیاستینین ترامپا قارشی پلانین اولماسی احتمالیدیر. آمریکا آدمینیستراسییاسین‌دا روبیونون بیر چوخ مسئله‌ده ترامپین علیه‌اینه مؤقع سرگیلدیی، خارجی سیاستده فرقلی گئدیشلر ائتدیی حاقدا کفایت قدر معلوماتلار موجوددور. بونونون آمریکانین ماراقلاری ایله باغلی فرقلی یاناشمادان داها چوخ، روبیونون ترامپا قارشی موقع‌ییندن قایناقلاندیغی احتمال اولونور. اونون ۲۰۱۶-جی ایل سئچکی کامپانیاسیندا ترامپا قارشی سرت مؤقع توتماسی، حاضردا دا دولت کاتبی کیمی تمثیل اولوندوغو آدمینیستراسییاسینین رهبری اولان پرزیدنتله ضدیتلر یاشاماسی دقتی بو استقامته یؤنلدیر. روبیونون ترامپ آدمینیستراسیاسینین کسکین تنقیدچی‌سی اولان، حتی آچیق دشمنچی‌لیک موقعیی سرگیله‌یه‌ن بوب منندزله بیرلیکده ارمنستانی دستکله‌مه‌سی ده بو فکری گوجله‌ندیرن مقاملارداندیر. هر ایکی شخصین – منندز و روبیونون ترامپا قارشی چیخماسی، ائلجه ده ارمنستان سیاستینده عینی مؤقع‌دن چیخیش ائتمه‌لری دولت کاتبینین ایروان سفرینده علاوه معمالار یارادیر.