مورتضا دوست علی نژاد (دینمز) 21 فئورال 1974-جی ایلده تبریزشهرینده آنادان اولوب . حاضیردا همین شهرده یاشاییر.

1988-جی ایلدن شعر یازماغا باشلایان شاعیرین بیر چوخ شعری ایراندا نشر اولونان قَزئتلرده چاپ اولوب . "گؤی سانجی چکیر" آدلی کیتابی ایشیق اوزو گؤروب.

گلمه گئجه

سن گلیرسن...

ایکی گؤز, ایکی دوداق, ایکی اَل

ایکی آیاق گلیر اوستومه

بیردن ایکییه بؤلونورم

یاریلانیرام!

یاریم اؤلو, یاریم دیری

من بیر اؤلو, یاریم دیری

منده بیر اؤلو, بیر دیری یاشاییر

بیریسینه چؤره ک, بیریسینه سو داشیمالییام

چؤره ک اللریمین قابارلاریندان,

سو گؤزلریمین دامارلاریندان چیخیر

یوخ, منده بو گوج یوخ !

گوج اوره یی اولمایان آداملاردا اولار...!