کانالین دیگر سئریاللارینی بیلمیرم، اما بیزیم سئریالیمیز هئچ ده یاریمچیق قالماییب، فینال بؤلومو یازیلیب دا، چکیلیب ده، یاییملانیب دا. رئیتینگی ایسه هئچ واخت آشاغی اولماییب.

بو سؤزلری خزر تی وی-ده یاییم‌لانان، مطبوعات‌دا یاریمچیق قالدیغی ادعا ائدیله‌ن «۲۸ ایون» سئریالینین سسئناریستی گولای حوسئینووا کولت. آذ-آ دانیشارکه‌ن دئییب. او، سئریالین رئیتینگده ایکینجی اولدوغونو بیلدیریب:

«هر هفته کانال رهبرلیگی طرفیندن منه رئیتینگ جدولی گؤندریلیردی: «۲۸ ایون» سئریالی رئیتینقگده ایکینجی اولوردو. بیرینجی‌لیک ایسه «جئهیزسیز گلینلر»ده ایدی. بو ساحه‌دن، آز دا اولسا، باشی چیخان اینسانلار بیلیر کی، رئیتینگی اولمایان لاییحه‌یه هئچ بیر کانال گونده‌لیک ائفیر تکلیف ائتمیر. هله ۳-جو بؤلوموموز یاییملانان زامان کانال رهبرلیگی طرفیندن منه سئریالین هفته‌لیک‌دن گونده‌لییه کئچیریلمه‌سی حاق‌دا تکلیف گلمیشدی. قبول ائتمه مه ییمین تک سببی بو ایدی کی، «۲۸ ایون» سئریالینین سسئناری‌سی اوریژینال ایدی، داها اؤنجه خاریجی اؤلکه‌لرده یاییم‌لانان هر هانسی بیر سئریالین آذربایجان سایاغی واریانتی دئییلدی. یعنی صیفیردان حکایه و قهرمانلار یازیردیم. بوتون مؤلف حقوقلاری منه عایید ایدی. بئله اولدوغو حال‌دا دا گونده‌لیک بؤلوم یازماق اولدوقجا چتین ایشدیر. بونا فیزیکی جهت‌دن تاب گتیره بیلمزدیم. ائرکه‌ن فینال ائتمه ییمیزین سببی آذربایجان‌دا سئریال بازارینین برباد وضعیت‌ده اولماسی‌دیر».