کولت. آذ اومید نجاری نین "فالچی" آدلی حکایه سینی سیزه تقدیم ائدیر.
سیقارت آلماغا چیخمیشدیم. محله‌نین چیخیشینداکی کؤشکه یاخینلاشیب بیر قوتو سیقارت ایستدیم. ائوه طرف یولا دوشمک ایستییردیم کی، آرخادان بیر سس منی چاغیردی: «جاوان اوغلان، بیر باخ بورا!». باشدان-آیاغا قارا گئیینمیش قارایانیز بیر قادین یئرده اوتوروب قوجاغینداکی کؤرپه‌نی امیزدیریردی. امدیی سود کؤرپه‌نین آغزینین قیراغیندان آخیب آنانین قارا اتیینه دامیر، آغیمتیل لکه‌لر یارادیردی. کؤرپه‌نین یاناقلاریندا خیردا، قیرمیزی سپگی لر وار ایدی، اونون قیز و یا اوغلان اوشاغی اولدوغونون فرقینه وارا بیلمدیم. قادین منی چاغیریردی. «بلی... ائشیدیرم!» دئدیم. تبسسومله «بیر مانات وئر فالینا باخیم» دئدی. الیمی جیبیمه سالیب ایکی مانات چیخاردیم، «...فالیما باخماغا احتیاج یوخدور، گؤتور»- پولو فالچییا اوزاتدیم... سسینی یوکسلتدی: «اولماز... قادان آلیم، قوی حالال اولسون. الینی وئر، فالینا باخاجام.» فالا، فالچییا اینانماسام دا، غیری-ایرادی الیمی اونا طرف اوزادیب، اووجومو آچدیم. لاکین قادین درحال الیمین آرخا طرفینی چئویریب، دقتله باخماغا باشلادی. سانکی خریته اوزرینده کؤهنه بیر شهر آختاریردی. بیردن باشینی قالدیریب، گؤزلرینی گؤزلریمه زیلله‌یه‌رک، بیر نفسه «آنان کئچه‌ن ایل قارلی بیر سحرده دونیاسینی دییشدی، آتئیست سن، بیر ایله یاخیندیر بو شهره گلمیسن، تلفون نؤمره‌نین سونو ۸۹ ایله بیتیر، حیات یولداشیندا اوچ ایل اول آیریلمیسان، چوخ گؤزل پئشه ن وار...» سؤیله‌دی. تعجب‌دن دونوب قالمیشدیم کی، سون جمله‌نی ائشیدیب گولومه سه دیم. صیفتیمه سیرایت ائتمیش ایفاده نی سئزه ن قادین داوام ائله دی: «هه... ایشسیزلیک گؤزل پئشه‌دیر، یاراشیقلی اوغلان». ماتیم-قوتوم قوروموشدو... قادینین سؤیلدیکلری دوغرو ایدی. منیم حاقیمدا بو قدر معلوماتی هارادان و نئجه توپلامیشدی؟.. ایشسیز اولدوغومو دا بیلمیشدی... حالبوکی، ظاهری گؤرکه‌میمله هئچ ایشسیز آداملارا بنزمیردیم... قادین کؤرپه‌نی دؤشوندن آییردی، ساغ الینین قالدیریب قارا اوزون بارماقلارینین اوچونون قاتینی آچدی، اوزومه دقتله باخدی.
-جمعی اوچ گونون قالیب.
-آنلامادیم، نئجه یعنی؟
-یعنی اوچ گون زامانین وار، اوچ گوندن سونرا حیاتدان کؤچه‌جکسن!
-اؤلجه‌یم یعنی؟
-هه، دوز اوچ گوندن سونرا.
اوره ییم گیزیلده‌دی، بدنیمدن بیر اورپَرتی کئچدی.
-سن نه دانیشیرسان، خانیم، جاوان اوغلانام، نیه اؤلمه‌لییه‌م کی؟ بلکه بیر ده باخاسان الیمه؟ – سون جمله‌نین آغزیمدان چیخدیغینا قولاقلاریم اینانمادی..
باشینی یئلله‌دی.
-«پیشه وری» پارکینین اورتاسیندا اوجا بیر کوکنار آغاجینین آلتیندا سکامیا وار. شنبه گونو ساعت ۲۱:۰۰ دا اؤلوم سنی اوردا گؤزله‌یه‌جک.
-گئتمه‌سم نئجه اولاجاق؟
-فرقی یوخدور، او سنین گؤروشونه گله‌جک. اما بیل کی، سنین قیسمتین، آلین یازین اوردادی.
گولمه‌یه باشلادیم. فالچی قادینین قاشلاری آلنیندا دویونله‌ندی، الینی بیر ده قالدیردی، بارماقلاری ایله اوچ رقمینی خاطیرلاتدی. سیماسیندا آجی بیر تبسسوم یاراندی.
- یاخشی دااا... آرتیق گئده بیلرسن»- قادینین سسی کال چیخدی..
آیاغا قالخدیم، اَییلیب چانتامی گؤتوردوم، ائوه ساری یولا دوشدوم.
گؤره‌سن من نیه گنج اؤله جم؟ آخی اؤزومو ساغلام حیس ائدیرم، آلتی آی بوندان اول قان تحلیلی ده وئرمیشم. حکیم ساغلام اولدوغومو سؤیله میشدی. بس آرزولاریم نئجه اولاجاق؟ هانسی آرزولار؟ منیم داها آرزوم یوخدور. یوخ... اولا بیلمز. فالچیلار هامیسی یالانچیدیرلار. فال دا، فالچی دا یالاندان، فیریلداقدان باشقا بیر شی دئییل! قادینین تک مقصدی مندن پول قوپارماق ایدی... او منیم گله جه ییمی بیله بیلمز! کیمدیر، آخی، او؟ نوستاراداموس؟ خیر. هئچ کیم، هئچ کیم گله‌جک حاقیندا اؤنجه‌دن دقیق معلومات وئره بیلمز. قادین یالان دئییردی..
قورخو حیسی تدریجا روحوما سیزیردی، اللریم سویویوردو، اوره ییم سیخیلیردی...داریخماق حیسی تپه‌دن دیرناغا منی بورویوردو. آنامین اؤلدویونو، یولداشیملا آیریلدیغیمی هاردان بیلدی؟ نه اولسون کی، بیلدی؟ بلکه، بو محله‌ده یاشاییر، بلکه، قونشولاریم واسطه‌سیله ییغیب بو قدر معلوماتی.. او، ایشینین پئشه کاری اولان بیر یالانچی ایدی. وسسلام. اؤلومون زامانینی کیمسه قاباقجادان سؤیله‌یه بیلمز! ائوه چاتیب تئز بیر ایستکان سرین سو ایچدیم کی، بلکه بو واهیمه جانیمدان چیخسین. فالچینین صیفتی، اوزون قارا بارماقلاری گؤزومون قاباغیندان گئتمیردی. «اوچ گون... اوچ گون...» سسی قولاغیمدا چینگیلدییردی. آج اولدوغومو بئله اونوتموشدوم. دیواندا آرخاسی اوسته اوزاندیم، قولومو آلنیما سؤیکه دیم، گؤزلریمی تاوانا زیللدیم. قادینی و باشیما گلن بو عجایب حادثه‌نی اونوتمالییدیم. هئچ بیر گوجو اولمایان، عادی بیر قادینین سؤزلرینه نیه بو قدر اؤنم وئریردیم؟ زامانیمی بئله معناسیز، بوش شی لره صرف ائتمه مه لیدیم. گویا کی، شنبه گونو او پارکا گئده جکدیم؟ آخی، گئتمه‌یه‌جم. قادینین دئدیکلرینین فیکیرلریمی آلت-اوست ائتمه‌سینی آنلایا بیلمیردیم. بلکه ده، هر شی ساده‌جه زارافات ایدی. سویوق، یئرسیز و قورخونج زارافات. بو فیکیرلرله ایکی گونومو باشا ووردوم.
.... یوخوسوزلوقدان اؤزومو او قدر یورغون حیس ائدیردیم کی، ائودن چؤله چیخماغا طاقتیم یوخ ایدی. زامانیمی اینترنت‌دن فیلم ایزله‌مکله کئچیریردیم. فالچینی و مشوم نیطقینی اونوتماق ایستییردیم. یئنه نووتبوکومو آچدیم، ایزله‌مک اوچون فیلملرین ائلئکترون کاتالوقونا داخیل اولدوم، غریبه ایدی، هانسی فیلمی سئچدیمسه، قارشیما فرانسیزلارین مشهور «پاپیللون» او («کپنک») چیخدی. بلکه ده اینترنت‌ده قاریشیقلیق وار ایدی. قالخیب ائوین ایچینده گزمه‌یه باشلادیم. گوزگونون قاباغیندا آیاق ساخلادیم. ساچلاریم بیر-بیرینه یاپیشمیش و یاغلانمیشدی. چیممک اوچون حاماما گیردیم، اما سویو آچمادیم. بیراز حامامدا اوتوروب فیکیرلشدیم. آجلیقدان اوره ییم آغزیما گلیردی. مطبخه گئتدیم. سویودوجودا ایکی گون اول‌دن قالمیش پلوو وار ایدی. گؤتوروب حاماما گلدیم و یئمه‌یه باشلادیم. حامامی داها گووَنلی یئر بیلیردیم، بئینیم‌ده دولاشان فیکیرلرلردن سانکی بورادا اوزاقلاشیردیم. یئمه یی بیتیره‌ندن سونرا سویو آچدیم، سسینی دینله‌مه‌یه باشلادیم. کراندان آخان سویون شیریلتیسی نیاگارا شلاله‌سینین سسی ایمیش کیمی، قولاقلاریمی دئشیردی. آیاقلاریمی سویون آلتینا توتدوم. سودان بوخار قالخیردی، اما ندنسه ایستینی حیس ائتمیردیم، الیمله آیاقلارما توخوندوم، بوز کیمی سویوق ایدیلر. سویو باغلادیم. حامامدان چیخدیم. آیاقلاریم ایسلاق-ایسلاق گوزگویه طرف گئتدیم. دوروخدوم.. گوزگوده اؤزومو گؤرمه دیم. گؤزلریمی یوموب آچدیم... گوزگو قارشیمدایدی، اؤز یئرینده ایدی، گوزگوده عکسیم یوخ ایدی، گوزگو منی گؤسترمیردی...دئیه‌سن، حقیقتا سون گئجه‌م ایدی...کیتاب رفینه ساری آددیملادیم، رفده‌کی کیتابلارین آدینی بیر-بیر اوخوماغا باشلادیم. بوکووسکی نین «ماکولاتورا» اثرینی گؤتوروب ورقله دیم. بو کیتابی آنام هدییه ائتمیشدی. کیتابی بورنوما طرف قالدیریب ورقلرین قوخوسونو جییه ریمه چکدیم. آنامین یایلیغینین عطری گلیردی...
قارا فالچییا اینانیردیم. باره مده دئدیی هر سؤز حقیقت ایدی. او، یالان دئمیردی. ساعت ۲۱:۰۰-دا «پیشه وری» پارکیندا حیات سون سؤزونو منه دئیهجکدی. سونون نفه‌سینی حیس ائدیردیم.
یولومو گؤزله‌یه‌جک کیمسه یوخ ایدی. کاش کی، سئودییم بیر قیز اولایدی، هئچ اولمازسا اونونلا ویداعلاشاردیم. اولسا ایدی، زنگ ائدیب «باغیشلا منی، باغیشلا کی، عؤمور آمان وئرمه‌دی، یئنی‌دن اللرینی توتام. سنینله بیر یووا قورا بیلمدیم، سئوگیلیم! منی سئودیینه گؤره تشککور ائدیرم» دئیه جکدیم، سؤزلریمین سونوندا من آغلایاجاقدیم، ساری ساچلی قیز دا تلفون خطینین او بیری طرفینده، منه قوشولوب هؤنکور-هؤنکور آغلایاجاقدی. سئودییم قیز «ایمکان وارسا گئتمه، سئوگیلیم، اوزاقلاشما... سنسیز یاشایا بیلمرم» دئیهجکدی. من ایسه محاربه‌یه گئدیب شهید اولاجاغینی بیله‌ن عسگر کیمی «سنی مزاریم اوسته گؤزله‌یه‌جم، تئز-تئز گل گؤروشومه» دئییب سونرا تلفونو سؤندوره‌جک، گؤزلریمین یاشینی کؤینه ییمین قولو ایله سیلجکدیم...
قیسا حیاتیمدا اؤز وارلیغیمی اونودوب، یاشاماماغی ترجیح ائتدییم گونلریم چوخ اولوب. یاخشی کی، صاباح او کوکنارین آلتینداکی اوتوراجاقدا بو حیاتلا بیردفعه‌لیک ویداعلاشاجام. کیم بیلیر، اونون اوستونده نئچه-نئچه سئوگیلی لر اوتوروب، قارانلیقدا عشق‌دن-محبت‌دن، گله‌جک اومیدلری حاقیندا دانیشیبلار، گیزلین-گیزلین اؤپوشوبلر. اوتوراجاقدان منه دوشن پای ایسه یالنیز اؤلوم اولاجاق.
بلکه، او اوتوراجاقدا راحت-راحت دونیادان کؤچه‌جه‌یم. بلکه ده، چتین اولاجاق. هانسی شکیلده اؤله جم؟ بلکه بوغولاجام، سون نفه‌سیمی نفسسیزلییمین سوکوتوندا وئره‌جه‌م؟ بلکه یاناجام؟ قوورولا-قوورولا، عذاب و اضطیراب چکه-چکه، آلیشیب یاناجام، کوله دؤنه‌جم؟ اینسان اؤلمک ایستمیر. لاکین اؤلومون هنیرتی‌سینی حیس ائد‌نده، بیله‌نده کی، اؤلوم بورنونون دیبینده‌دیر، او زامان سون نفه‌سینی وئرمه یین ان راحت شکلینی آرزولاییر اؤزونه.. اما حیاتین اؤز پلانلاری وار. کائیناتین مؤحتشم نیظامیندا اینسان اؤز باشینا حرکت ائده بیلمز. حیات اینجیتمه‌دن ال چکه‌سی دئییل، نیظامی پوزانین جزاسی کسیلمه‌لی‌دیر.
....قیسمت!.. آلین یازیسی!...هه، منیم قیسمتیم محض او کوکنارین آلتینداکی اوتوراجاغین اوستونده‌دیر.
«قیسمت» سؤزونون ایچیمده حضور یارادان گوجونه حیران قالدیم. جانیما، قانیما سانجی کیمی، آغری کیمی هوپان قورخونون گئتدیکجه آزالدیغینی حیس ائدیردیم. اؤلومه اوزو آغ و آلنی آچیق گئده‌جم! چونکی، قیسمت بئله ایمیش! هر گون یئمک بیشیرمک‌دن، جوراب یوماقدان، چیممک‌دن، حتی یان قونشونون دیغ-دیغ آروادینین سسین‌دن و اوشاقلارینا چیغیریشیندان یاخام قورتاراجاق. بیر داها دایانمادان تکرارلانان حیات حادثه‌لری ایله اوزلشمه‌یه‌جم. اصلینده اینسانی اؤلدوره‌ن تکرارلاردیر، بونون آدینی بیز اجل قویموشوق. تکرار سؤزونون درینلیینده آجی بیر حیس ابدی یوخویا گئدیب. هر سحر یوخودان اویانیب عینی گونشی گؤرمک کیمی بیر حیس...
آیین سونوندا ائو ییه‌سی گلیب کیرایه حاقینی ایسته‌یه‌نده قاپینی آچان اولمایاجاق. بوتون کیتابلاریمی دیر-دیمزینه ساتیب، کیرایه پولونو گؤتوره‌جک. بوکووسکی نین «ماکولاتورا» اثرینی اوستومده گؤتورمه‌لییه‌م. ایجازه وئرمره‌م، آنامین یادیگاری، آنامین یایلیغینین عطرینی وئره‌ن کیتاب پولا ساتیلسین.
اوتوراجاغین اوستونده مئییدیمی کیمسه گؤره‌جک، یان-یؤره‌سینه باخاجاق، کیتابدان باشقا هئچ نه تاپمایاجاق، کیتابی گؤتوروب ساخلایاجاق. بلکه ده، مزاریمین ایچینه قویوب منیمله بیرلیکده باسدیراجاقلار. بو فیکیرلرله ساعاتا باخدیم، دوز ایکی ساعت قالیردی اؤلومه. قالخیب دولاب‌دان بیر دست یویولموش پالتار چیخاریب گئییندیم. کیتابی الیمه آلدیم، اوتاغیما سون دفعه نظر سالدیم. ائوده‌ن چیخیب یولومو او فالچی اوتوران یئردن سالدیم.
اوره ییمین درینلیینده بیر اومید قیغیلجیمی سؤنمک ایسته‌میردی، فالچی قادین منی گؤرسه، بلکه یانینا چاغیراجاق، اوچ گون اول سنه دئدیکلریمین هامیسی یالان‌دیر دئیهجکدی.
اوزاقدان فالچینین اوتوردوغو یئره باخدیم. قادین یئرینده دئییلدی، اوستونده اوتورماق اوچون یئره سردیی قالین کاغیذ پارچاسی اوزاقدان لکه کیمی گؤرونوردو. هاوا قارانلیغا ساری گئدیردی. بیلییمده‌کی ساعت ۲۰:۱۵- گؤستریردی. اؤلومه دوغرو آددیملاییردیم. آیاقلاریم آلتینداکی یئری سانکی حیس ائتمیردی، سرخوش آدام کیمی سنتیرله‌یه-سنتیرله‌یه یئرییردیم. عؤمرومده آیاقلاریم بئله کئییمه میشدی.
من بیر عؤمور آتئیست یاشامیشدیم، حتی بو دوشونجه ایله اؤزومدن باشقا چوخلارینا تأثیر ائتمیشدیم. ایندی هر هانسیسا بیر قوه آختاریردیم دعا ائتمه‌یه. دعا ائدیب دئیه‌م کی، کاش او بیریسی دونیادا الله اولماسین، یوخسا بو دوشونجه‌لریمین جزاسینی چکه‌جم. گؤرونور، تانری دئییله‌ن آنلاییش محض چتین آنلار اوچون دیرلی ایمیش. ایندی من، بو چیخیلماز آنیمدا بیر قوه آختاریردیم، ائله بیر قوه کی، بوتون اوره ک سؤزلریمی اونا دئیه‌م. تانریسیزلیغیم کیمسسیزلییمدن ده آجی ایدی...تانریسیز آخی اوره ییمده کیمینله دانیشاجاقدیم؟ کیمه دئیجکدیم کی، «باغیشلا"؟ تانری سؤزو «باغیشلا» دئمک اوچون یارانیب!
آرتیق پارکا یاخینلاشیردیم. اوزاقدان آغاجلار، پیشه وری نین عابده‌سی گؤرونوردو. قارانلیقدا پیشه وری نین هیکلینین اوستونه ایشیق سالمیشدیلار و عابده گونش کیمی یانیردی. پیشه وری نین ساغ چینینه قارا بیر قارغا قونموشدو، هیکلین قاشلاری دویونلنمیشدی، صیفتینه سرت ایفاده حاکم کسیلمیشدی. ائله بیل، قارغا اونو ناراحات ائدیردی. سانکی، هیکل بو دقیقه جانلاناجاق، الینی قالدیریب قارغانی قوواجاقدی. پارکا گیره‌نده هاوانین سویوق اولماسی جانیمی اوشوتدو. منه ائله گلدی کی، «پیشه وری» پارکی بو شهرین ایچینده دئییلدی، باشقا بیر سویوق ایقلیملی اؤلکه‌یه عایید ایدی، هاواسی دا عایید اولدوغو اؤلکه کیمی بوز کسمیشدی..
فالچینین دئدیی آغاجی آختارماغا باشلادیم. دوققوزا اون دقیقه قالیردی.. سونونجو دقیقه‌لریمده ده حیاتدا گؤزللیک تاپا بیلمیردیم. عمومیتله، دوستلاریم «حیات گؤزلدیر» دئیه‌نده همیشه تعجوبلنمیشم. آغاجی تاپدیم، او پارکین ان اوجا کوکنار آغاجی ایدی. اوجا کوکنارین رنگی پارکین او بیری کوکنارلاریندان فرقله‌نیردی.... ایلک دفعه ایدی کی، ساری رنگ‌ده بیر کوکنار آغاجی گؤروردوم. سانکی اونا دا دئییبلر کی، ساعت ۲۱:۰۰-دا اؤله جکسن، او دا کسیلمک، یا دا یانماق قورخوسوندان بئله سارالیب‌دیر.
کوکنارین آلتینداکی اوتوراجاغا یاخینلاشیب ایلشدیم. کیتابی یانیما قویوب ساعتا بیر ده باخدیم. اوچ دقیقه قالیردی... فالچینین اوچ بارماغی کیمی قورخونج و داریخدیریجی اوچ دقیقه... بدنیمی سویوق تر باسیردی. آلنیمدا پوچورلانمیش تر دامجیلارینی کؤینه ییمین قولو ایله سیلدیم.
یوخ... بئله اوتورمامالییام. اوتورموش وضعیت‌ده اؤلسم، اوزوقویلو یئره ییخیلا بیلردیم. اوزانماق اؤلوم زامانی ان دوغرو اصول‌دور.
کیتابی باشیمین آلتینا یاستیق عوضی قویوب اوتوراجاقدا اوزاندیم. اطرافدا اینس-جینس گؤزه دیمیردی. پارکدا مندن باشقا کیمسه یوخ ایدی کی، اؤلوم آنیما شاهیدلیک ائتسین. گؤزلریم کوکنارین سارالمیش بوداقلارینا ایلیشیب قالدی. سویوق تر آلنیمدان آخیب گؤزلریمه دولوردو. تریمی کؤینه ییمین قولو ایله سیلمک ایسته دیم، اما الیم قالخمادی. داها اؤلدویومه تام اولاراق اینانیردیم. نه کیرپیک چالا، نه ده گؤزلریمی قیرپا بیلیردیم. حددن آرتیق دینج بیر حالیم وار ایدی. لوس آنجلئسین بئش اولدوزلو اوتئلینده لوکس بیر چارپایینین اوستونده اوزانمیش کیمی دینج ایدیم. اطرافین سسینی، کوله یین ویییلتیسینی دویموردوم، هاوانین سازاغینی بئله حیس ائتمیردیم. چتین گونلر بو اوتوراجاغین اوستونده بیتمک‌ده ایدی. مترونون ایستانسییا آدلارینی دا، دوللارین مزه‌ننه‌سینی دا، تلویزییا خبرلرینی ده، ائو کیرایه‌سینی ده اونوتموشدوم. آرتیق دوشونه بیلمیردیم. آخی من اؤلموشدوم!
او بیری دونیانی گؤرمه‌یه تلسیردیم، آناملا گؤروشمه‌یه تلسیردیم. اما گؤزلریم هله ده آچیق ایدی، ساچلاریم گؤزلریمین ایچینه گیریردی. یاواش- یاواش قاتی ظولمت چؤکوردو. کولکلرین سوووروب آپاردیغی سرگردان بولود کیمی چکیسیز، یونگول ایدیم. من هاوادان دالغایا چئوریلمیشدیم! هر کس اؤلومدن سونرا بئله راحت اولاجاغینی بیلسه ایدی، یئر اوزونده بیر اینسان دا قالمازدی. ایچیمده بیریسی سسله‌نیردی: راحاتلاشدین، باخ... نه قدر گؤزلدیر بئله اولماق! اؤلومه عشق اولسون!
داها هئچ شی یوخ ایدی. هر یئر قارانلیق و سس سیز ایدی، سوکوتون اینقیلابی باش وئریردی.
... قولاغیمین دیبین‌ده هنیرتی حیس ائدیرم، کیمسه قولاغیما فوله ییر، دیکسینیب آیاغا قالخیرام. یانیمدا دایانمیش ایتی گؤرورم، قهوه یی گؤزلری ایله منه باخیر. ایتین نفه‌سی منی یوخودان اویاتمیشدی.
سحر آچیلمیشدی، ساعت ۶:۱۵- گؤستریردی. کوره ییم آغریییردی. یئنه گونشین صیفتی، یئنه آوتوبوسلارین سسی، یئنه سرچه‌لرین چیغیرتیسی، کوکنار... یالنیز قارشیمداکی ایتین مظلوم باخیشلاری بو احوالاتیمین شدتینی آز دا اولسا آلیردی.. ایت چوخ غملی باخیردی. سانکی منه باخیب اوزولوردو. اطرافیمدا گؤردویوم نه واردیسا، هامیسی منه سلام دئییر، خوش گلدین سؤیله ییردی و من بوندان چوخ اوزولوردوم...
اوتوراجاغین اوستوندن کیتابی گؤتوروب فالچییا دوغرو یولا دوشدوم. او یالانچی فالچینین یانینا گئدیردیم. او یالانچی فالچینین...
گئدیب اونا دئیه‌جم کی، سن یالانچیسان، سن منی آلداتدین. نیه اؤلمه دیم من؟ نیه اؤلومدن قاییتدیم؟ سن بیر ساختاکار فالچیسان، ساختاکار...
آخی من نیه اؤله بیلمه دیم؟ بلکه فالچی اؤلوم زامانینی دقیق دئیه بیلمه‌ییب؟ بلکه چاشیب؟ بلکه یاخین زاماندا، ان یاخین گونلرده اؤل‌جم؟
اینسان اؤلومو درک ائتدیی آندان سونرا یاشاماغی هئچ ایستمیر. هر اینسانا ایتیرمک‌دن، آیریلماق‌دان، ییخیلماق‌دان سونرا اؤلوم لذتلی گلیر.
آددیملاریمی ایری-ایری آتیردیم، فالچی اؤلوم زامانیمی اوزاق گونلره دئسه، بیرباشا اینتیحار ائده جم. بونو اؤزونه ده دئیه‌جم، دئیه‌جم کی، داها سنین اؤلومومون دقیق زامانینی دئمه یینه احتیاجیم یوخدو.
فالچینین اوتوردوغو یئره یاخینلاشدیم. خیلی اینسان توپلاشمیشدی، بؤیوک ایزدیحام وار ایدی. قاچا-قاچا ایزدیحامین ایچینه گیردیم. فالچی یئرینده ایدی، کوره یینی دیوارا سؤیکمیشدی، کؤرپه ده قوجاغیندایدی. فالچی ایله اوشاق آراسیندا بیر فرق وار ایدی، اوشاق ترپه‌نیردی، اما فالچی داش کیمی حرکتسیز اوتورموشدو. فالچینین گؤزلری برلمیش، حدقه‌سیندن چیخمیشدی، یانیندا یئرده بوش درمان شوشه‌سی وار ایدی. کؤرپه تعجبله ایزدیحاما باخیردی. اینسانلار پولیسین قورخوسوندان کؤرپه‌نی فالچینین قوجاغیندان گؤتورمک ایسته‌میردیلر.
من بو حالدا موطلق ائوه گئتمه‌لی ایدیم. اوتاغیما گیرمک ایستییردیم، قاپینی باغلاماق، ایشیقلاری سؤندورمک و «ماکولاتورا» کیتابیندان آنامین عطرینی آلماق...
