کولت. آذ خالق شاعری زلیمخان یعقوبون "زارافات ائلمه" شعیرینی تقدیم ائدیر:​

زارافات ائل‌مه، قوربانین اولوم،
بو دونیا زارافات میدانی دئییل.
قاریشقا یئریشی راحت یئریشدی،
بو میدان کؤهلن آت میدانی دئییل.

اوینادیب چوخ شئیی اومار، اویناما،
ائتسه ده روحونو خومار، اویناما.
سن بو قوماربازلا قومار اویناما،
زارافات گلمه‌سین سنه بو دونیا.

چوخ یئرده قبرینی قازان اولاجاق،
باشین قایناماقدان قازان اولاجاق.
سانما یاشاماغین آسان اولاجاق
زارافات گلمه‌سین سنه بو دونیا.

یوخسوللوق یوخسولون باغرینا اوخدو،
معده‌سی توخلارین مزه‌سی توخدو.
فیل وار، قاریشقاجا حؤرمتی یوخدو.
زارافات گلمه‌سین سنه بو دونیا.

چوخ یئرده مکرلی اویون اولاجاق،
شیر، پلنگ چئوریلیب قویون اولاجاق.
هله نئچه دفعه تویون اولاجاق،
زارافات گلمه‌سین سنه بو دونیا.

عؤمرونو قار یئییب، قیش آپاراجاق،
خیرماندان دنینی قوش آپاراجاق.
دونیادان الینی بوش آپاراجاق،
زارافات گلمه‌سین سنه بو دونیا.

قیبتین قویوسو، حیله‌نین تورو،
سنه دیری-دیری گؤسترر گورو.
باشین وار، باشسیزدان باشینی قورو،
زارافات گلمه‌سین سونه بو دونیا.

شیطان دورا-دورا شرلنر دوه،
قاتیر قویروغوندا هرلنر دوه،
کینیندن ییخیلار، تیرلنر دوه،
زارافات گلمه‌سین سنه بو دونیا.

موغامی آغلاماق، والی آغلاماق،
والین دا قیریلمیش حالی آغلاماق.
فیشقیریق چالماغین دالی آغلاماق،
زارافات گلمه‌سین سنه بو دونیا.

یاسین یئددیسی وار، اوچو، قیرخی وار،
قبیر یئرینین ده حاقی، نیرخی وار.
اؤلومدن سونرا دا مین جور قورخو وار،
زارافات گلمه‌سین سنه بو دونیا.

اور‌یه چکیله‌ن داغدی، دویوندو،
هر گون خیردالانان عؤموردو، گوندو.
گؤر بو دییرماندا کیملر اویوندو،
زارافات گلمه‌سین سنه بو دونیا.

زلیمخان، گوناهین یئددی قات اولار،
حیاتین قان دولو بیر حیات اولار.
زارافات ائیله‌سن، شاهین مات اولار،
زارافات گلمه‌سین سنه بو دونیا!