بختیار محمود اوْغلو وهابزاده(۱۹۲۵-۲۰۰۹) ۱۹۲۵-جی ایلده شکی شهرینده آنادان اولموشدور.

کولت. آذ خبر وئریر کی، آذربایجان ادبیاتی نین، بوتؤولوکده آذربایجان ادبی فیکری نین گؤرکملی نوماینده سی اوْلان خالق شاعیری بختیار وهابزاده نین آدی تکجه قوزئی آذربایجان رسپوبلیکاسیندا دئییل، اونون حودودلاریندان چوخ-چوخ اوزاقلاردا تانینیر. بختیار وهابزاده شاعیر، دراماتورگ، ایستعدادلی عالیم و پوبلیسیست اولماقلا یاناشی، غئیرتلی و جسارتلی ایجتیماعی خادیم، ساده و صمیمی اینسان کیمی ده تانینیر و سئویلیر. تصادفی دئییل کی، اونون اثرلری - شعر کیتابلاری، دراملاری و پوبلیسیستیک یازیلاری دونیانین چوْخ دیللرینده، او جومله دن اینگیلیس، فرانسیز، آلمان، فارس، پولیاک، ایسپان، ماجار و کئچمیش سوویت بیرلیگی نین بیر چوْخ خالقلارین دیللرینه ترجمه ائدیلمیش و بۇ اثرلر چوْخ بؤیوک ماراق و سئوگی ایله قارشیلانمیشدیر. ۱۹۳۴-جو ایلده عاییله سی ایله برابر باکییا کؤچموشدور. ۱۹۴۲-جی ایلده اورتا مکتبی بیتیریب، باکی دؤولت اونیورسیتتینین فیلولوگییا فاکولته سینه داخیل اولموش، ۱۹۴۷-جی ایلده همین فاکولته نی بیتیریب اونیورسیتتنین نزدینده آسپیرانتورایا قبول اولونموشدور.

او، هله ۶۰-جی ایللردن باشلایان میللی آزادلیق حرکاتی نین اؤنجوللریندن بیری اولموشدور. ۱۹۵۹-جو ایلده یازدیغی " گلستان " پوئماسی ایله ایکی یئره پارچالانمیش آذربایجانین تاریخی فاجیعه سینی دیله گتیرمیش، روس و فارس ایمپئرییاسی نین پنجه سی آلتیندا اینله ین آذربایجان خالقی نین آزادلیق و ایستیقلال اوغرونداکی عدالتلی موباریزه سینه قوشولموشدور. بو پوئمایا گؤره ۱۹۶۲-جی ایلده شاعیر " میللتچی " دامغاسی ایله آذربایجان دؤولت اونیورسیته سیندن چیخاریلمیش، یالنیز ۲ ایلدن سوْنرا یئرینه قایتاریلمیشدیر. سوویت رژیمینده میللی وارلیغی تاپدانان، هر جور محرومیتلره معروض قالان میلتین دردلرینی رمزلر و موختلیف ادبی اوسوللارلا ایفاده ایتمیش، ایری حجملی پوئمالاری و پیئسلرینده حادیثه لری یا تاریخه، یا دا باشقا اؤلکه لره کئچیره رک اؤز میلتی نین دردلرینی دیله گتیرمیشدیر.

بو واختا قدر قودرتلی سؤز اوستاسی، کسکین پوبلیسیست، ادبی-بدیعی پروسسین تشکیلاچیسی کیمی تانینان ب.وهابزاده سون واختلار خالقی دوشوندورن بیر چوْخ مثله لرده، او جومله دن اویدورما قاراباغ پروبلئمی ایله علاقه دار مساله لرده آغساققال کیمی جیددی فعالیت گؤستریر. هابئله او، آنا دیلیمیزین صافلیغی، تمیزلیگی اوغروندا دایم، یورولمادان موباریزه آپاریر. ب.وهابزاده نین ائوی بیر نوع، میلتین اومید قاپیسینا دؤنموشدور. بئله کی، رئسپوبلیکانین موختلیف کند و رایونلاریندان هر گون اونلارلا مکتوب آلیر، نئچه-نئچه شیکایتچینی ائوینده قبول ائدیر، اونلاری دینله ییر و ایمکان داخیلینده هر بیری نین دردینه علاج ائتمه یه چالیشیر.

یارادیجیلیغی بویو خالقین ایستک و آرزولارینی ترنم ائدن، بۇ آرزولارین حیاتا کئچمه سینه چالیشان وطنداش شاعیر اوچون خالقین منافعی اونون شخصی منافعیینه چئوریلمیشدیر.

بختیار وهابزاده ۲۰۰۹جو ایلینین فئورال آیینین ۱۳ونده ۸۴ یاشیندا دونیاسینی دییشدی و فخری خیابانیندا دفن اولدو.