کولت. آذ دومان یالچینین شعرینی تقدیم ائدیر:

زامان گولوشونو اکیبدی یئره
آغزیندا دیشلری بیر-بیرین تؤکور
اینی کؤینه یینه بیراز دارالیب
شالواری قیچیندا یاخاسین سؤکور

گور سسی شهری سالاما سوخور
الینده قزئتلر رنگینی سؤلور
سؤزلری عاغلینی گولوشه سریب
دوداغیندا دردین گؤزلری گولور.

آه...الی قارنیندا شهری گزیب
کوچه قوجاغیندا دینجینی آلیر
معده سی اؤزونه توی-بایرام توتوب
یوخسوللوق ماهنیسین مورگولو چالیر.

یئردن قورو چؤرک پاراسی تاپیب
یئمه یینی اؤپوب آغزینا تپیر
پاییز جیبلرینده گیلاوار اسیر
الیله غئیرتین قزئته سپیر.

ازلدن عاغلینی دانیر بلکه ده
دلیخای دونیادا سئوینج آراییر
گؤزلرینده حایات اؤزونو بوغوب
داغینیق تئللرین ظولوم داراییر...