کولت. آذ گونئی‌لی یازار ابراهیم رشیدی ایله موصاحیبه‌نی تقدیم ائدیر:

- حاضردا گونئی‌ده آنا دیلینین وضعیتی نه یئرده‌دیر؟ اینسانلار بو دیل‌ده تحصیل آلا بیلمدیکلرینه گؤره آنا دیلی گئتدیکجه سیرادان چیخماق تهلوکه‌سی ایله اوز-اوزه قالیب‌می؟ ۲۰ ایل اول ایندیکی دؤورو موذاکیره ائد‌ن‌ده اینسانلارین آنا دیلین‌دن ایستیفاده‌سین‌ده هانسی‌سا یئنیلیکلر وارمی؟

بیزده دیل یالنیز دانیشیق دیلی دیر و یازیلی دیل یوخ حئسابیندادیر. ایران تورکلرینین تخمینن یاریسی سحر تزدن آخشاما قدر فارسجادا یوخسا باشقا بیر دیلده بیرجه جومله دئمه یه احتیاج دویمورلار و دیگر یاریسی عاییله و دوسلوق موحیطینده تورکجه بعضن ایش یئرلرینده و ساتیش مرکزلرینده فارسجا دانیشیرلار بعضن او مرکزلرده ده تورکجه دانیشیرلار. آما بیر دیل مادام کی یازی دیلینه چئوریلمه ییب، مدنیت و دوشونجه دیلی اولماق ایمکانینی ایتیریب هر زامان سیرادان چیخماق تهلوکه سینی حیس ائدر. دانیشیق دیلی یئنی سؤزجوکلر اوره ده بیلمز و یئنی سؤزجوکلردن یوخسول اولان بیر دیل تئکنیکا و بیلیم ساحه سینه گیرمز. بئله آلانلاردان دیشلانان دیل بئیین بوجاغیندا یورد سالان نوستالژیک سؤزجوکلردن باشقا بیر شئی دئییل.
آما کئچن ۲۰ ایلده بیر سیرا دییشیملر نتیجه سینده گونئی آذربایجانا دوغرو، اوغورلو قاپیلار آچیلیب. تی وی لر، سانال دونیا سیته لری ، آذربایجان و تورکییه موسیقی دالغالاری بورداکی اینسانلارا تورکجه نین گلیشمیش و یئنی دونیا احتیاجلارینا جاواب وئره بیلن بیر دیل قدر یوکسلدیب. بو یوکسلیش او دیلده دانیشان اینسانلاری یئنی دونیا اینسانلاری قدر یوکسلدیب، غورور و گونج باغیشلاییب.

- آنا دیلینین اینسانلار آراسین‌دا اونودولماماسی اوچون باشقا هان‌سی چیخیش یوللاری گؤستره بیلرسینیز؟

داها گونئی آذربایجان و بوتونلوکله ایراندا، آذربایجان تورکجه سینین اونودولما قورخوسو یوخدور. چونکو بودیل، بو گون بؤلگه میقیاسیندا مدنییت و بیلیم ساحه لرینین ایرلی لمیش دیللریندن بیری اولاراق اؤزونو خالقا گؤسترمکده دیر. اکونومیک و اکادئمیک اینسانلار بو دیله احتیاج دویور. اونو داها گوجلندیرمه یه بو دیلده مدرن اینسانا گرکن هر بیر شئیین چوخ یوموشاق و ساده فورمادا اولماسی لازیمدیر. اینسان احتیاجی اولدوغو شئیلری هر یاندان اولموش اولسا تاپیب الده ائتمک ایسته ییر و نه یاخشی بونو راحات و ساده فورما دا اؤز دیلینده تاپسین.

عمومیتله، گونی‌دا یاشایان آذربایجان‌لیلارین واحید آذربایجان دیلی الیفباسین‌دان، گراماتیکاسین‌دان ایستیفاده‌سی ساحه‌سین‌ده نه ائتمک اولار؟

ائله بو سورغو جاوابیندا دا ائله همن مقاما دؤنمه لییم . دونیا آذربایجانلی لارینین ، گوندم یاشام احتیاجلارینی و او احتیاجلارین چؤزوم یوللارینی بو دیلده اورتیب مئیدانا چیخارماق لازیمدیر. عموم خالقین دیله باخیشی فلسفی، ادبی، یوخسا میللی بیر باخیش دئییل. اونلار دیله یاشاملارینی ائتکیله ین عامیللرین چؤزوم آراجی و واسیطه سی کیمی باخیرلار. اونلارین ایلنجه زامانلاری بو دیلده و بو الفبادا اولمالیدیر. اونلارا اؤنملی اولان خبرلر بو دیلده یاییلمالیدیر. یوخسا اونلار او خبرلری باشقا دیللرده آختاریب تاپاجاق . نئجه کی بوگون گونئی آذربایجان خبرلری قوزئی سیته لرینده یوخ بلکه فارسجا سیته لرده گئدیر و اینسان اونا اؤنملی اولان خبری اوردا تاپیر اورا یؤنه لیر.خبر بو دیلده اولورسا خبری اختاران اینسان خبرله بیرگه دیلی ده کشف ائده جک.

ایران حکومتی گونئی آذربایجان‌دا آنا دیلی ایله باغلی هانسی وعدلری وئرمیش‌دی؟ و بونلاردان هانسینا عمل ائتدی؟

ایراندا حوکومتلر بیر-بیر گلیر وعده لر وئریب گئدیرلر. وعده وئردیکلری آنلار اؤزلری ده یالان سؤیله دیکلرینی بیلیر خالقدا همنی آنلاییر. اونا گؤره نه حوکومت عمل فازینا گیریر نه خالق او وعده لری اونلاردان طلب ائدیر. بوردا حوکومت-میللت آراسی اوچوروم گئت گئده درینلشیر.

گونئی‌ده آنا دیلین‌ده تحصیلین تعمین اولوناجاغینی گؤزلییرسینیزمی؟ هان‌سی پروسئسلردن سونرا بو مومکون اولا بیلر؟

هله لیک دؤولت طرفیندن بو دیلده تحصیله ایمکان یوخسا ایذن وئرمک قرارلاری گؤرونمور. آما گونئی آذربایجاندا یارانمیش میللی اویانیش بئله گئدرسه اونلاری بو ایشه وادار ائده جک . بو ایش اؤز سرانجامینا چاتمازسا هر ایکی طرف چوخلو زیان گؤره بیلر.

Axar.az سایتی گونئی‌ده آنا دیلینین قورونماسی و اینکیشافینا نه درجه‌ده دئستک اولا بیلیر و بونونلا باغلی هان‌سی فعالیتلریمیزین داهادا گئنیشلندیریلمه‌سینی و یا هان‌سی لاییحه‌لرین سایت طرفین‌دن باشلادیلماسینی توصیه ائدردینیز؟

بیر اؤرنک وورمالییام. علی اغا واحید، شهریار ، رشید بهبودوف و ابراهیم تاتلی سس بوردا تورکجه نی گئنیش خالق کوتله سینه یایماقدا فرقلی روللاری اولموش. چونکو اونلارین اینجه صنعتی یوموشاق و ساده دیلده اینسانلارین ایلنجه و دینجلیک زامانلارینا اویغون ایدی. سیته لریمیز هر نه دن آرتیق گئنیش کوتله اوخوجوسو و دینله ییجیسینی نظرده آلمالیدیر. بایات و کوهنه لمیش فورمالاردان و خبرلردن اوزاق دورروب هر گون یئنی و اؤنملی اولان بیلگیلری خالقا چاتدیرمالیدیر خوصوصیله گونئی یه اویغون خبر و بیلگی نی.