آنا صحیفه کولت |
کؤچورن: فرخ جرایدی
هله من یئریمدن قالخمامیْشدیم ، قاپیْنی ووُردولار . دوُروب آچدیْقدا تهمینه خانیْمی گؤردۆم . نه اۆچۆن گلدیگینی سوْروشدوقدا گۆلهرک
« گؤردۆن قیْزین باشیْنا نه بلا گلدی »- دئیهرک جواب وئردی .
« هانسی قیْزین ؟ »
« نینا نین ، آغیْلسیز نینا نین»
« نه اوْلدو کی؟»
« نه اوْلاجاقدی ، آرشاک دان بوْشاندی»
« نه اۆچۆن بوْشانمیْش دیر؟»
« دئییرکی آرواد ساخلایان دگیل . گئجه-گۆندۆز کئفلی اوْلور ، نه بیلیم نه اوْلور».
« ائله ایسه چوْخ یاخشی ائیلهییب .»
بوُ سؤزه زینب باجی دا گلدی . اوْ دا همین سؤزلری دئییردی.
نینا بوُ سؤزلری کنسول خانا دا دا دئمیش و بوْشاندیْقلارینی خبر وئرمیْش ایدی.
من ارمنستانا ( تبریزده ارمنستان کۆچهسی ) گئتمیشدیم . قاییتدیْقدا نینا نین یانیْنا گئتدیم . نینا دان بیر سیْرا اؤنملی بیلگیلر آلماق لازیم ایدی . کنسول خانا دا نه کیمی ایشلر گؤرۆندۆگۆندن خبر سیز ایدیک . قاراداغلی لارین یئنی هجوملاری حاقیندا چیْخان سؤزلر گئت-گئده چوْخالیْردی.
من ایچهری گیردیکده میناسیانین قادیْنی شوشانیک خانیْمی گؤردۆم . اوْ منی گؤردۆکده چوْخ سئویندی.
نینا ائوده ایدی . من ایچهری گیرهن کیمی ، « اوْتور » دئیه سؤزه باشلادی.
« پیس بیر خبر واردی . تبریزی یئنی بیر فلاکت گؤزلهییر . سنی گؤرمک ایستهییردیم »
« نه خبر؟»
« رحیم خان چلبیانلی نین ۱۲۰۰ آتلی ، ایکی قوْشون پیاده ، بیر نئچه توْپلا حرکت ائتدیگینی اهر شهریندن کنسول-ا خبر وئرمیشلر . کنسول خانادان بلگه ( رمز ) ایله تهرانا و پترزبورگا خبر گؤندریلدی».
نینا نین یانیْندا اوْتورماغا واقتیم یوْخ ایدی . اوْرادان چیْخیب امیره خیْز-ا گلدیم . یئنی خبری ستارخانا سؤیلهدیم.
سردار تئلفونلا انجمنه خبر وئردی:
« مجاهدلرین ائولرینه بوُراخیْلماسی مسالهسی گۆندهلیک تارتیْشمالاردان گؤتۆرۆلمهلی دیر».
سردار تلفوندا کیمینله ایسه آجیْقلی دانیْشیردی : « هه ،هه » دئیه رنگی دگیشیلیردی.
« من امر ائدیرم کی ، بیر نفر مجاهد بئله ائولرینه بوُراخیْلماسین . من خرجلر اۆچۆن پوُل تاپارام . تلفون لا هر سؤزۆ دئمک اوْلماز . دئدیگیم کیمی اوْلمالیدیر . اوْلمازسا مسوولیت سیزین بوْینوزادیر».
ستارخان تلفونو یئره قوْیوب دئدی:
« بوُنلار هر بیر شئییی تجارت و قناعت باخیْمیندان اؤلچۆرلر . یئنهده حاج مهدی دیر . « آرتیْق آداملاری بوُراخمالی دیر . خالقیْن پوُلو ایله موفته یئینلری دوْیورماق اوْلماز .» دئییرلر . شیطان دئییر بوُ آلچاقلاری حکومت اوْردوسونون قاباغیندا بوُراخ ، چکیل گئت ایشینه . نه ائدیم . ناموس قوْیمور».
سردار لازیمی آداملاری یانیْنا چاغیْردی . نوْبار ، مارالان طرفیندن قوْروماق حاضرلیغی گؤرۆلمهسی حاقیندا امر وئردی.
باقرخان لا گؤرۆشمک اۆچۆن گئدهجگینی سؤیلهدی . فایتوْن حاضرلاندی . من ده باقرخانین گؤرۆشونه گئتدیم .
تاریخ
2019.02.26 / 14:05
|
مولف
محمد سعید اردوبادی
|