کؤچورن: فرخ جرایدی

بوُگۆن نینا-نی سؤز وئردیگیم وقتده گؤره بیلمه‌دیم. بارماغیْم یارالانمیشدی. اوْنو باغلاتدیْرینجا آخشام ساعت بئش اوْلموشدو. یارالانانلار خسته خانایا، اؤلۆلر ایسه یاخیْندا کی مسجدلره توْپلانیردی. ساعت بئش‌ده نینا-نین ائوینه گئتدیم. نینا منی گؤرر کن:

" نه وار؟ نه یوْخ؟" دئیه سؤزه باشلادی. " عین الدوله‌دن خبرین اوْلدو مو؟"

- " تَزَه خبر می وار؟"

" عین الدوله بوُگۆنکۆ ساواش دان سوْنرا صاحب دیوان باغیندا اوْتورماغیْن قوْرخونج اوْلدوغونو گؤرۆب نعمت آباد-ا چکیلدیگینی کوْنسول-ا خبر وئردی".

" یالنیز بوُ موُ؟"

" عین الدوله اؤز گؤندردیگی خبرینده، بئله دئییر :" تبریز چئوره‌سینده دوُران حکومت اوْردوسو چۆرۆک بیر قوُووه دیر. بوُ جۆر بیر قوُووه ایله تبریز-ی گؤتۆرمه‌گین ممکن اوْلمادیغی منه بللی اوْلدو. شاه سئون، ماکو، خوْی، قاراداغ، تهران، بختیاری، دئوران، کئیگاوند، خمسه، سراب قوْشونلاری گلیب چیْخدیقدان سوْنرا حکومت اوْردوسونون سایی ۴۰- مینه واراجاقدیر. حاضرده تبریز ایچریسینده اوْلان سلاحلی قوُووه‌لر، حکومت اوْردوسوندان ساییدا بیر نئچه کَره آرتیْق دیر. بوُنلارا دوُروملارینین یاخشیلیغی دا یاردیْم ائدیر. اؤزل لیکله، انقلاب چیْلارین الینده قوُرشون و بوْمبا قاییران ماشینلار اوْلدوغو اۆچۆن هجوم ائدن قوُووه‌لره چوْخ تلفات وئریرلر."

نینا بوُنلاری دانیْشیر کن اوْنون انقلابا نه قدر دَرین بیر رغبت بسله‌دیگینی گؤرۆب من چوْخ سئوینیر و بوُ قهرمان قیز-ا فخرله باخیْردیم. نینا دانیْشدیقجا اوْنون کئچمیشی گؤزۆمۆن قارشیْ‌سیندا جانلانیردی. یانیْمدا ایکی نینا گؤرۆردۆم. بوُنون بیری سیاست بیلمه‌ین، گۆنده‌لیک اوْخومایان نینا، ایکینجی‌سی ایسه بۆتۆن وارلیْغینی انقلابا و ازیلمیش کۆتله‌لرین اوُغور یوْلوندا دؤیوشه قوُربان وئرمه‌گه حاضر اوْلان نینا ایدی.

من اوْنو داها دا سئویندیرمک و ایناندیرماق اۆچۆن انقلاب قوُووه‌لرینین یئر توُتدوغو دوُروملار حاقیندا بیلگی‌لر وئرمه‌گه باشلادیم:

《 عین الدوله نین امیره خیْز اۆزه‌رینده هجومونو قیْرماق و بۆتۆن هجوم دایره‌سینی آتشه توُتماق اۆچۆن، حاج میرباقر باغیْنین یانلاریْندا یئنی سیستم‌لی آغیْر توْپلار یئرلشدیریلمیشدیر. بوُنلاردان چوْخ قاباقدا یئری هئچ وجه ایله دشمنه بللی اوْلمایان ایکی اوُزاق ووُران توْپ قوُرولموشدور. باقرخان جبهه‌سینی قوْروماق اۆچۆن گؤی مسجد و مارالان-دا دا یئنی توْپلار قوْیولموشدور. ارک چئوره‌سینده و ارک-ین دامیْندا هجوم-ا فرصت وئرمه‌یه‌جک قدر آغیْر و یۆنگۆل توْپلار یئرلشدیریلمیشدیر. دوُرومون آغیْرلیغینی گؤزه آلان قافقاز سوْسیال دموکرات لاری اؤزل لیکله باکیْ ایشچی‌لری آخیْن-آخیْن گلمک‌ده دیر. باکیْ ایشچی لری انقلابا یوْل گؤسترمک ایشینه چوْخ یاردیم گؤستریرلر. توْپلار-ی ساواش کئچیرمیش قافقازلی لار ایشله دیرلر. بوْمبا، باریْت ساری سیندان هئچ کوْرلوق چکیلمیر.

"ستارخان قافقازدان گلنلرین ایش باشیْنا کئچمه‌گه کؤنۆل وئریر می؟"

"راضی اوْلور، یاخشی دا قارشیلاییر. یالنیز بوُنا لازیمینجا اؤنم وئرمیرلر. بوُدا ایشلرین یاخشی گئتمه‌سینه قارشی گلیر. ستارخان سوْسیال دموکرات لارین نه دئدیگینی و بوُرایا نه آماج لا گلدیکلرینی ایندیلیکده اوْ قدر ده باشا دۆشه بیلمه‌میشدی"

" باقرخان نئجه دیر؟"

"اوْ، نه قافقازدان گلنلره، حتا امیره خیْزدان گلنلره، ستارخان-ین اؤزۆنه ده اؤنم وئرمیر. اوْ یئرلی قافقازلی لارلا ایلگی ( ارتباط) ده دیر. بیز بوُ آداملارین اَل بیر لیگی ایله اوْنا یاردیْم ائدیریک. بوُ آزلیقلاری گؤزه آلمایاجاق اوْلساق، باقر خان -دا چوْخ بؤیۆک بیر آغیْرلیق (متانت) واردیر. اوْ هئچ بیر قوْرخو بیلمه‌ین آدام دیر. باقرخان چتین لیک آرتدیْقجا گۆج و اؤز گۆوه‌نی نی آرتیْران، اؤلۆمه دلیجه‌سینه گئدن، قوُرشونلارا قارشی دؤشۆنۆ آچیب ایره‌لی‌یه دوْغرو باغیْران بیر آدام دیر. بوُندا انقلابیْن اَن دَیرلی بیر اؤزل لیگی وار کی اوْ دا کسگین اراده یه و یئنیلمز گۆج-ه یییه ( مالک) لنمه سی دیر.